Ѕидот од камената доба откриен под брановите кај германскиот балтички брег можеби е најстарата позната мегаструктура изградена од човек во Европа, велат истражувачите. Ѕидот, кој се протега речиси еден километар по должината на морското дно во заливот Мекленбург, беше забележан случајно кога научниците управуваа со сонарен систем со повеќе зраци од истражувачки брод на студентско патување на околу 10 километри од брегот. Поблиското испитување на структурата, наречена Блинкервол, откри околу 1.400 помали камења, кои се чини дека биле поставени за да поврзат речиси 300 поголеми камења, од кои многу биле премногу тешки за да се поместат.
Потопениот ѕид, опишан како „возбудливо откритие“, е покриен со 21 метар вода, но истражувачите веруваат дека го изградиле ловци собирачи на копно покрај езеро или мочуриште пред повеќе од 10.000 години. Иако целта на ѕидот е тешко да се докаже, научниците се сомневаат дека тој служел како патека за ловците во потера по стадата ирваси.
– Кога ловите животни, тие ги следат овие структури, не се обидуваат да ги прескокнат. Идејата би била да се создаде вештачко тесно грло со друг ѕид или со брегот на езерото – рече Јакоб Герсен од институтот за истражување на Балтичко Море „Лајбниц“ во Варнеминде, германски пристаништен град на балтичкиот брег.
Друг ѕид што се протегал покрај Блинкервол можеби бил закопан во седименти на морското дно, пишуваат истражувачите во зборникот на Националната академија на науките. Алтернативно, ѕидот можеби ги натерал животните во блиското езеро, забавувајќи ги и олеснувајќи им го ловот на луѓето што чекале во заседа во кануа, вооружени со копја или лакови и стрели.
Врз основа на големината и обликот на ѕидот долг 971 метар, Герсен и неговите колеги сметаат дека е малку веројатно дека е формиран од природни процеси, како што е масивно цунами, кое ги преместило карпите на своето место, или карпи, кои зад себе ги оставил глечерот во движење.
Аголот на ѕидот, кој е претежно помал од еден метар, ја менува насоката кога ќе се сретне со поголеми камења, што сугерира дека купиштата помали камења биле поставени намерно за да ги поврзат. Се смета дека камењата на ѕидот тежат вкупно над 142 тони. Ако ѕидот бил древен пат за лов, тој веројатно бил изграден пред повеќе од 10.000 години и потопен со зголемувањето на нивото на морето пред околу 8.500 години.
– Ова го става Блинкервол меѓу најстарите познати примери на ловечка архитектура во светот и потенцијално го прави најстарата вештачка мегаструктура во Европа – велат истражувачите.
Герсен сега сака повторно да ја посети локацијата за да го реконструира античкиот пејзаж и да бара животински коски и човечки артефакти, како што се проектилите што се користат во ловот, кои може да бидат закопани во седиментите околу ѕидот, пишува „Гардијан“.
