Животни
Веројатно сте ја доживеале ситуацијата да бидете во друштво на личност што повеќе гледа во својот мобилен телефон отколку во вас, поради што во одреден момент едноставно сте станале и сте си заминале. Понекогаш навистина нема смисла да се обидувате да натерате пријател да го стави телефонот во џеб, а кучињата се чувствуваат исто кога се обидуваат да му го привлечат вниманието на својот сопственик. Ниеден одговорен сопственик не сака да го занемари домашното милениче, но експертите велат дека токму тоа го правиме, односно ги игнорираме, честопати ненамерно.
Кучињата често бараат блискост со сопственикот со тоа што ја ставаат главата под раката, го гледаат сопственикот, кој е на другата страна на собата, лежат пред неговите нозе, го допираат со шепата, ги следат неговите стапки, носат играчка или предмет, понекогаш нешто што им е забрането. Сето тоа не треба да се сфати како нивна грубост, туку како обид да ви кажат нешто. Затоа, ако кучето го направи сето тоа што е опишано погоре, размислете што се случило тој ден или непосредно пред неговата реакција, дали сте му посветиле доволно внимание или дали му требало нешто.
Сопствениците тврдат дека нивните кучиња се способни да ги предупредат кога гледаат во телефонот или во телевизорот предолго: тие едноставно ги удираат со шепата додека телефонот не падне на подот или се обидуваат да бидат поинтересни од подвижните слики на телевизорот. Сепак, постојат ситуации кога секој обид на кучето да му го привлече вниманието на сопственикот не дава резултат и тоа едноставно се откажува. Кучињата, како и луѓето, бараат модели на однесување, па ако сте доста често на телефон, кучето веројатно ќе го забележи времето кога сте зафатени. Сепак, бесцелното сурфање на телефон мора да се прекине, бидејќи може да ја ослабне врската меѓу вас и вашето куче.
