Технолошкиот напредок ги менува границите
Технолошкиот напредок ги менува границите на човечките можности побрзо од кога било. Во ерата во која дигиталните и биолошките револуции се одвиваат паралелно, концептот на „човечко зголемување“ станува сè поприсутен. Целта на оваа научна дисциплина е да ги подобри нашите природни способности, но и радикално да ги подобри сите човечки квалитети.
Дали тоа нѐ води кон иднината во која луѓето стануваат џинови – физички, интелектуално и технолошки?
Генетска еволуција
Денес ние веќе користиме уреди како паметни часовници, протези со вештачка интелигенција и бионски импланти што ги подобруваат нашите когнитивни и физички функции. Сепак, иднината на човечкото зголемување ветува многу повеќе од тоа – од генетски инженеринг и нанотехнологија до биомеханички екстензии, кои би можеле драстично да ги зголемат нашата големина, сила и издржливост.
Едно од најрадикалните сценарија е можноста за генетски инженеринг, кој би им овозможил на луѓето да пораснат до височини што денес се незамисливи. Научниците веќе ги проучуваат гените одговорни за раст и развој на коските, а модификациите на тие гени би можеле да им овозможат на луѓето да пораснат до три метри. Иако таквите промени би можеле да донесат придобивки во физичката сила и издржливоста, се поставува прашањето како нашите кардиоваскуларни и скелетни системи би се справиле со таквите промени.
Егзоскелети
Додека генетиката нуди долгорочни можности, краткорочните решенија доаѓаат од биомеханичките иновации. Напредните егзоскелети веќе се користат во медицината и во воената индустрија за да им овозможат на лицата со посебни потреби повторно да одат или да им олеснат на војниците да носат тешки товари без замор. Во иднина таквите егзоскелети би можеле да се развијат до точка каде што целосно ќе ги надминат човечките граници – дозволувајќи им на луѓето да достигнат височини и сила што претходно биле видени само во научната фантастика.
Покрај физичките подобрувања, невротехнологијата ја отвора вратата за зголемување на човечката интелигенција и когнитивните способности. Развојот на импланти како чипот „неуралинк“ овозможува директна интеракција помеѓу човечкиот мозок и компјутерите, што може да го забрза процесот на учење, меморирање и донесување одлуки. Ако таквите системи се комбинираат со биомеханички екстензии, би можеле да добиеме луѓе не само со поголема големина туку и со супериорна интелигенција.
Етички дилеми
Иако можноста да станеме џинови звучи фасцинантно, се поставува прашањето како општеството би одговорило на овие промени. Дали би се создала нова класа на „подобрени луѓе“? Како светот би ја приспособил инфраструктурата за поголеми и посилни луѓе? Што би значело тоа за процесите на еволуција и природна селекција?
Човечкото зголемување повеќе не е само научнофантастична идеја – тоа е реалност во развој. Без разлика дали иднината носи генетски подобрени џинови, биомеханички натдлуѓе или натчовечки интелектуалци поврзани со вештачката интелигенција, едно е сигурно: границите на човечките способности постојано се менуваат. Останува прашањето дали ние ќе ја обликуваме иднината или технологијата ќе нѐобликува нас.
Темата за постоењето на џинови во минатото често се провлекува низ митови, легенди и теории на заговор, но научните докази дека имало луѓе со огромна висина, значително поголеми од денешните просечни димензии, не се потврдени. Многу древни општества имаат приказни за џинови. Во нордиската митологија се спомнуваат јотуните, огромни суштества што често биле во конфликт со боговите. Библијата зборува за нефилимите, суштества што наводно произлегле од спојот на ангелите и луѓето. Слични приказни постојат меѓу Маите, Инките, Кинезите и Индијанците. Со текот на годините се појавија тврдења за откритија на џиновски скелети, но ниту еден од тие докази не помина научна проверка. Некои фотографии на кои се прикажани огромни скелети или черепи подоцна беа изложени како фалсификат или како резултат на манипулација со фотографии. Американската институција „Смитсонијан“, која често се споменува во теориите на заговор, никогаш не потврдила дека поседува останки од гиганти.
