Вработените во српската фабрика за оружје „Застава“, кои минатата недела го прекинаа штрајкот, се загрижени таа да не помине во рацете на домашните тајкуни, поради можноста што им се нуди со Законот за производство и промет на оружје и воена опрема. Деловните резултати од почетокот на годината се вложуваат, а во првите три месеци загубата изнесува 200 милиони динари. Сите досегашни обиди на раководството и на синдикатот да се дојде до компромисно решение за излез од сегашната неповолна состојба во фабриката не дадоа резултат, поради што работниците се одлучија привремено да го прекинат производството, пишува „Данас“.
Поради ваквата состојба купувачите веќе изразиле загриженост и побарале гаранции од раководството дека договорите ќе бидат испочитувани. Тоа што најмногу ги загрижува вработените во фабриката за пешадиско вооружување, ловечко спортско оружје наменето за лична одбрана е приватизацијата, односно продажбата до 49 отсто од капиталот на шест најзначајни воени фабрики од одбранбената индустрија на Србија на домашни или странски инвеститори. Според постојната регулатива, секој поединечен инвеститор не може да купи повеќе од 15 отсто од акциите.
Вработените во фабриката „Застава“ од Крагуевац би се согласиле малцинскиот пакет-акции да се продаде на некоја кредибилна странска компанија, како што е американскиот гигант во воената индустрија или познатата фирма од Италија, која се споменуваше како потенцијален партнер. Но експерти сметаат дека ограничувањето на правото на сопственост на акциите до 15 отсто нема да биде привлечно за странските компании, така што постои голема веројатност оваа фабрика да премине во управување на некој домашен тајкун. За странските инвеститори е недоволно привлечно и поседување 49 отсто од акциите на оваа компанија, затоа што и натаму би биле малцински сопственик, кој не би можел суверено да одлучува за производната, деловната и кадровската политика, а главниот збор ќе го имаат Министерството за одбрана и Воено-безбедносната агенција на Србија.
Најголеми шанси во трката за продажба на дел од фабриката за оружје има еден српски бизнисмен, кој остварува блиски релации со владејачката партија СНС. Тој, според пишувањето на „Данас“, бил на црната листа на ОН, бидејќи било потврдено дека пред 15 години пешадиското оружје што било наменето за Нигерија било продадено за Либерија, која е под санкции на светската организација.
