Манифестацијата „Денови на македонска култура во Будимпешта“ се организира по повод 30 години изучување на македонскиот јазик на универзитетот ЕЛТЕ, Будимпешта. Овој семестар 13 студенти ја посетуваат наставата по македонски јазик на лекторатот, од година на година се зголемува интересот за изучување на македонскиот јазик
Месецов унгарската публика имаше можност да проследи серија културни настани од Македонија во рамките на манифестацијата „Денови на македонска култура во Будимпешта“, која се организира по повод 30 години изучување на македонскиот јазик на универзитетот ЕЛТЕ, Будимпешта. Лекторатот по македонски јазик при Институтот за славистика и балтичка филологија е отворен во 1989 година. Организатор на манифестацијата е Лекторатот по македонски јазик во соработка со здружението на Унгарците „Теледом“ од Скопје.
Овој семестар 13 студенти ја посетуваат наставата по македонски јазик на Лекторатот по македонски јазик на универзитетот ЕЛТЕ, од година на година се зголемува интересот за изучување на македонскиот јазик. Според лекторот Златко Панзов, организирањето на вакви културни настани овозможува поголема видливост на самиот лекторат и воопшто будење на љубопитност и интерес за македонскиот јазик, литература и култура кај пошироката унгарска публика.
„Деновите на македонска култура во Будимпешта“ започнаа со проекција на македонскиот филм „Исцелител“. На отворањето на манифестацијата, лекторот Златко Панзов истакна дека оваа манифестација треба да стане традиционална, имајќи ги предвид добрите македонско-унгарски културни врски градени во текот на изминатите неколку децении, со надеж дека македонската култура ќе биде редовен културен избор за унгарската публика во иднина.
Амбасадорот Горан Стевчевски ја поздрави ваквата иницијатива укажувајќи на важноста на ваквите културни настани за подобрување и засилување на врските меѓу двете земји и искажа голема благодарност до Златко Панзов, лектор по македонски јазик. Унгарската публика имаше можност да погледне селекција од македонски кратки филмови создадени во периодот 2017-2019 година. Селекторот на филмовите, Александер Нискач од Фестивалот на краток филм во Љубљана, истакна дека ова е првпат да прави селекција од македонски кратки филмови што се прикажуваат надвор од Македонија и дека претставува одлична можност за промовирање на македонскиот краток филм.
„Сашо Поповски Трио“, пак, одржа концерт во „Будапест џез-клуб“, еден од најдобрите џез-клубови во Европа. Унгарската публика имаше можност да слушне уникатни џез-композиции проткаени со ориентални мотиви во одлична изведба на триото составено од Сашо Поповски – гитара, Иван Бејков – бас и Виктор Филиповски – тапани.
„Деновите на македонска култура во Будимпешта“ беа затворени со промоција на унгарскиот превод на романот „Вештица“ од Венко Андоновски. За романот зборуваше Иштван Лукач, професор на универзитетот ЕЛТЕ. Романот од македонски го преведе Анамарија Цинеге-Панзова. Венко Андоновски одржа и предавање за хрватскиот поет Матош пред студентите на групата за хрватски јазик и книжевност на Институтот за славистика и балтичка филологија.
