Најновите истражувања покажуваат дека мнозинството луѓе во светот не консумираат доволно количество храна богата со растителни влакна, која, пак, е клучна во превенцијата на срцевите болести, срцевиот удар и ракот. Според препораките, просечен човек треба да консумира околу 30 грама растителни влакна на ден, а возрасен човек дневно внесува само 60 проценти од препорачаната доза.
Консумирањето храна богата со растителни влакна може да им помогне на лицата што имаат проблеми со варењето, па, така, редовното консумирање ваква храна може да помогне во подобрувањето на работата на дигестивниот систем.
Кои се најдобрите начини за вклучување во исхраната?
Зголемувањето на внесувањето храна богата со влакна во што е можно побрз временски рок е најдоброто нешто што може да го направите за вашето здравје. Сепак, кога ќе почнете да внесувате таква храна, треба да знаете дека на самиот организам му е потребно време за адаптација. Тоа не значи дека за да се чувствувате подобро треба да го зголемите количеството повеќе од препорачаното, туку на внесувањето ваква храна да гледате исто како на вежбање. Не почнувате веднаш со правење екстремни вежби, туку минувате период на адаптација, нели? Затоа, внесувањето храна богата со растителни влакна треба да се прави етапно. На пример, ако во исхраната сте внеле леб од цело зрно, по една до две недели треба да почнете да консумирате поголемо количество овошје.
Течноста е клучна
Кога започнувате со поголем внес на храна богата со растителни влакна во исхраната, важно е да знаете дека треба да го зголемите и количеството на течностите што ги внесувате во организмот. Ако не пиете доволно вода, може да не ги почувствувате бенефициите од овој начин на исхрана, туку напротив, може да се соочите со запек. Ако на пример консумирате житарки со големо количество растителни влакна, а притоа не внесете доволно количество вода, тоа може само да предизвика блокада на работата на дигестивниот систем.
Доколку сте љубител на кафето и на чаша вино, треба да го зголемите уште повеќе внесот на течности за да обезбедите оптимално искористување на храната, но и за доброто функционирање на дигестивниот систем, бидејќи кофеинските напитоци само ве тераат да ги исфрлате течностите од организмот.
Каква храна треба да внесувате?
Ако јадете еднолична храна што е богата со растителни влакна, нема да ги добиете посакуваните ефекти, бидејќи клучна е разновидноста на исхраната. Потребно е да јадете различни видови јадења богати со влакна за да ги почувствувате придобивките од овој начин на исхрана.
Старите залудно не рекле дека појадокот е најважниот оброк во текот на денот. Затоа, тој треба да е богат со хранливи состојки и, секако, богат со влакна. Затоа, ако досега консумиравте житарки што се полни со шеќери, треба нив да ги замените со оние што се од цело зрно или, пак, со вкусна каша од хелда.
Леб и тестенини од цело зрно од житарки
Нутриционистите препорачуваат да се зголеми внесот на леб што е направен од житарки од цело зрно, но и да се внимава во исхраната кога се консумираат тестенини, тие исто така треба да бидат од цело зрно.
Компир со лушпа
Доколку го знаете потеклото на компирот, односно, знаете дека не е хемиски третиран или, пак, вие го одгледувате во вашиот дом, најдобро е да го консумирате со лушпата, која е богата со растителни влакна.
Мешункасти растенија
Грашок, леќа, грав, боранија, се еден од најдобрите извори на растителни влакна. Сварени или печени се одличен и здрав оброк за целото семејство.
Овошје и зеленчук
Она што е можеби најважно кај ваквиот начин на исхрана е доволниот внес на овошје и зеленчук. Во зимскиот период, кога нема голем избор на овошје што би го консумирале, сушеното овошје е секогаш добар извор на влакна. Комбинирајте ги кашите од цели зрна со други намирници, за да добиете оброк богат со растителни влакна. На вашиот организам ќе му обезбедите доволно количество растителни влакна доколку често консумирате и бадеми, јаболка, јачмен, брокула, малини, артичока, круши, авокадо, спанаќ, банани, портокали, прокељ, суви сливи…
