Во Соборниот храм „Свети Климент Охридски“ во Скопје денеска се одржа утринска божиќна литургија по повод Рожденството Христово.
Со литургијата чиноначалствуваше поглаварот на Македонската Православна Црква – Охридска Архиепископија, г.г. Стефан, во придружба на свештенослужители на МПЦ-ОА. Во божиќната порака, тој на верниците им посака да се сакаат едни со други, а оваа година да биде време на победа над злото и непријателството и време кога ќе заврши страдањето од коронавирусот.
– Ова е време кога посебно се испитува нашата вера. Животот на народите, и покрај сите постигнувања, станува сѐ потежок и понеизвесен. Живееме во време со многу кризи на економски, политички, социјален, образовен, здравствен, и особено на морален план. Затоа и не можеме да ја разбереме целта на човековиот живот и неговата смисла, ниту пак можеме да го најдеме патот до спасението, затоа што се оддалечивме од Бога, и едни од други – порача г.г. Стефан.
Пандемијата, како што истакна тој, ни докажа колку човекот е немоќен и покрај сета своја самоувереност и сите свои достигнувања и знаења.
– Најстрашната пандемија на денешницата е што луѓето заборавија да веруваат во Бога и да ги љубат ближните, а покајанието е најдобриот лек против сите болести на телото и на душата – рече поглаварот на МПЦ-ОА.
Божиќ денеска со утрински литургии се одбележа и во останатите храмови на Македонската православна црква.
