Македонија чека сите земји членки на НАТО да добијат зелено светло од домашните власти за потпишување на протоколот за членство, јавува дописничката на МИА од Брисел.
Откако Грција го ратификуваше Преспанскиот договор минатата недела, Македонија е во исчекување во наредните денови да се одржи амбасадорски состанок во седиштето на НАТО, на кој треба да се потпише протоколот за нејзиното членство. Прашањето е строго процедурално, уверуваат дипломатите во Брисел.
Конкретно, протоколот треба прво да биде потпишан од сите 29 земји членки, се очекува ова да се случи на амбасадорско ниво во седиштето на НАТО, за време на состанок на Северноатлантскиот совет (познат во жаргонот како НАК) кој ќе биде свикан штом секој амбасадор добие авторизација од дома. Секоја земја членка, меѓутоа, познава различни домашни процедури.
Во некои земји членки доволно е министерот за надворешни или владата да дадат авторизација, како што е случај со Словенија. Јелко Кацин, словенечкиот амбасадор во НАТО веднаш по ратификацијата на Преспанскиот договор во Атина изјави дека веќе добил дозвола од неговата влада да го потпише протоколот за Македонија.
Во други земји, пак, одобрувањето поминува преку парламентот, што може да ја забави малку процедурата, но, дипломатите тврдат дека во ниеден случај „нема политички пречки“ од ниту една земја членка.
Штом сите 29 земји членки го дадат зеленото светло, НАТО ќе ја информира Македонија и ќе ја покани на потпишувањето, се очекува земјата да ја претставува министерот за надворешни работи, Никола Димитров.
Во секој случај сите се уверени дека станува збор за денови, максимум недела до две, што би и овозможило на министерката за одбрана Радмила Шекеринска, да допатува во Брисел и да учествува на следниот министерски состанок за одбрана на 13 февруари како идна полноправна членка на Алијансата.
Полноправното членство, пак, ќе се случи откако сите парламенти на земјите членки ќе го ратификуваат овој протокол, процедура која може да трае и повеќе од една година. Иако повеќето дипломати се оптимисти дека до почетокот на 2020 година Македонија ќе си го заземе столчето како де јуре членка на Алијансата.
Таква проценка има и Јелко Кацин, кој во петокот рече дека „македонското знаме би можело да се вее пред седиштето на НАТО до крајот на оваа година, најдоцна на почетокот на 2020 година“.
Словенија од први јануари е „контакт точка“ за македонската амбасада во НАТО, што значи дека преку словенечката амбасада се одвива важен дел од дипломатската активност и комуникација.
Грција мора да биде прва земја која ќе го ратификува пристапниот протокол.
Периодот до полноправното членство не е за потценување, сметаат дипломатите, бидејќи во тој период Македонија се „дообучува“ и се подготвува преку своите набљудувачки активности и учество на клучните состаноци на Алијансата.
