Од Владата смируваат, а дел од експертите велат дека Македонија ќе има мал индиректен ефект откако САД воведоа 33 отсто царина за македонските производи. Од Владата порачуваат дека нема потреба од никаква паника, ниту од избрзани реакции и заклучоци. Станува збор, како што велат, за нешто долго најавувано од администрацијата на претседателот Доналд Трамп, и не е одмината ниту една земја – дури ни најстарите и најтрадиционални партнери на САД.
– Станува збор за очекувана одлука на американската администрација, која не ја одмина ниту една земја во светот – дури ни Велика Британија, Канада, Европската Унија и уште стотици други држави. Владините тимови веќе некое време ги анализираат можните последици и заедно имаме подготвен план за надминување на ситуацијата. Оваа одлука нема да има голем импакт врз нашата економија, но ние имаме јасен план како понатаму – посочија од Владата по вчерашната објава на американскиот претседател Трамп за воведување царини за речиси цел свет, меѓу кои и 33 отсто за македонскиот извоз.
Оттаму додаваат дека веќе се воспоставени контактите со американската администрација и дека ќе продолжат на високо ниво, а Владата, како што посочија, ќе работи на изнаоѓање решение и на спроведување на планот. Воведувањето царини го оценија како обид за репреговарање на трговските односи во светот, нешто, како што велат, што беше неопходно и што, иако сега за некои претставува шок, за други ќе значи можност.
Според дел од експертите кои ги цитира МИА, воведувањето на високата царинска тарифа на САД кон нашата земја ќе има индиректен ефект пред се врз автомобилската и петрохемиската индустрија во земјава. Тие се согласни дека земјава учествува со многу мал процент во увозот на САД, но дека глобалната економија влегува во една голема неизвесност што секако ќе се одрази и кај нас во делот на приливот на странски инвестиции. Велат дека државата треба да ги бара решенијата преку стратешки дијалог со САД за да се иницира преиспитување на царинската стапка и да се побара подобар третман.
Според универзитетскиот професор Трајко Славевски, станува збор за мал директен ефект што земјава би го имала затоа што учествуваме со многу мал процент во увозот на САД, речиси незначителен, а од друга страна САД се на 24 место на листата на наши трговски партнери. Нашите стратешки партнери како што е Германија, смета професорот Славевски, се повеќе погодени, а тоа секако ќе се одрази и врз нашата економија, пренесе МИА.
Извршната директорка на ЕОС Матрикс и претседателка на Европската бизнис асоцијација, Катерина Бошковски, вели дека воведувањето на царините од страна на американската администрација ќе има значителен импакт особено кон земјите членки на ЕУ, а кај нас ефектите ќе бидат малку пролонгирани.
Никица Мојсовска Блажевски, извршна директорка на „Macedonia2025“, како што пренесе МИА, смета дека воведените царини може да доведат до намалување на идните можни инвестиции од нашата дијаспора во САД.
