СОНК доби покана за продолжување на преговорите во 15 часот во просториите на МОН.
– Очекувањата од попладневната средба ни се измешани. Според нас, засега има добра иницијатива, посебно затоа што министерот најави дека ќе пренасочи средства од МОН за барањата на СОНК. Очекуваме конструктивен разговор. Според преговорите ќе зависи и дали понатаму ќе продолжи штрајкот или не. Јас само се надевам дека ќе имаат сериозен пристап со што побрзо ќе им излеземе во пресрет на децата и на родителите – изјави Неделков за „Нова Македонија“.
Самостојниот синдикат за образование, наука и култура од понеделникот организира генерален штрајк во училиштата и градинките поради тоа што со Владата не постигна договор за зголемување на платите во дејностите образование и детска заштита.
На првиот ден на штрајкот, во понеделникот, беше најавено дека средба меѓу синдикатот и владини претставници ќе има деновиве во обид да се најде прифатливо решение.
Преговорите меѓу СОНК и Владата во изминатите две недели завршија без договор. По последната средба минатиот понеделник, Неделков рече дека нема краткорочно решение со кое веднаш ќе се зголемат платите на дејностите што ги застапува Синдикатот и поради тоа на 11 април го активираше најавениот штрајк.
Синдикатот бара платите на вработените веднаш да бидат зголемени за 18,4 отсто согласно со порастот на минималната плата која од овој месец е 18.000 денари и, дополнително, таа да биде основица со која ќе се множат коефициентите на сложеност на работни места.
