Корона-пандемијата придонесе за зголемено користење на официјалните интернет-страници на градот, општините и јавните претпријатија. Така, наместо да ги посетуваат канцеларите на надлежните, граѓаните сѐ повеќе се навикнуваат од удобноста на својот дом да комуницираат по електронски пат со надлежните
Фреквентна онлајн и електронска комуникација за решавање граѓански проблеми пред надлежните
Скопјани почнаа да ги користат алатките достапни на официјалните интернет-страници на градските и општинските власти и на јавните претпријатија. Пандемијата што го зафати целиот свет, па и нашата земја, придонесе за зголемено користење на официјалните интернет-страници на градот, општините и јавните претпријатија, па, така, наместо да ги посетуваат канцелариите на надлежните, граѓаните полека се навикнуваат да комуницираат со надлежните од удобноста на својот дом. Онлајн комуникацијата со општините и градските претпријатија граѓаните најчесто ја применуваат за решавање различни проблеми, но и за прашања поврзани со даночна политика, легализација на бесправно изградените објекти, административни процедури, улично осветлување, пријавување диви депонии и слично.
До Градот најчесто барања од комуналната и даночната сфера
Од Градот велат дека граѓаните користат секаков вид комуникациски алатки при пријавувањето на проблемите со кои се соочуваат. Се јавуваат телефонски, пишуваат преку електронска пошта на означените контакти за потребната услуга или проблем, а во последниве неколку години доста од нив ги пријавуваат и на официјалните профили на Град Скопје на социјалните мрежи Фејсбук и Твитер.
– Областите за кои контактираат со нас или пријавуваат проблеми се различни, а најчесто нѐ бараат за проблеми од комуналната сфера, даночни прашања, како и за информации за разни субвенции и конкурси што се распишани од наша страна – информираат од Град Скопје.
Се користат сите електронски алатки за комуникација со општините
Граѓаните и предходно и сега ги користат општинските страници како средство за комуникација со надлежните, а на тој начин секако комуницираат и жителите на општината Центар.
– На страницата има формулар кој, пополнет, се поврзува директно со службите на општината и подоцна се работи на решавање на проблемите на граѓаните. Пријавените проблеми во најголем дел се однесуваат на комунални работи, односно оштетена урбана опрема, оштетени улици, комунална хигиена, прегорено улично осветлување, но и прашања за урбанизмот, легализација на градби и други секојдневни проблеми и прашања што ги мачат – велат од Општина Центар.
Целата комуникација на надлежните од Општина Гази Баба со граѓаните оди преку мејл, бидејќи во услови на ковид-19 општината работи со максимално редуциран број на странки. Граѓаните од службите електронски добиваат одговори за нивните предмети или барања што ги имаат доставено до општината.
– На двете службени мејл-адреси, кои овој период општината ги има целосно приспособено за комуникација со граѓаните, дневно пристигнуваат најразлични мејлови со барања и информации од граѓаните.
Најчесто за предмети поврзани со легализација на бесправно изградени објекти, но и пријави за диви депонии или, пак, предлози за одредени проекти што треба да се реализираат во нивното населено место. Истите тие се проследуваат до соодветните сектори во согласност со утврден протокол, од каде што потоа се дава детален одговор на прашањето што го испратил граѓанинот. Поради коронавирусот, Општина Гази Баба почна и онлајн одржување на приемен ден за граѓаните, каде што градоначалникот преку апликации за видеокомуникација остварува средби со граѓаните – појаснуваат од оваа скопска општина
И бутелчани сѐ почесто ја користат општинската онлајн страница за комуникација. Надлежните од Бутел велат дека тие им пишуваат за дополнително информирање за надлежностите на општината и дали може во општината да завршат некои административни обврски, вадење потврди и други документи.
– Ни упатуваат и прашања во врска со матичната служба или со подрачната единица на Министерството за финансии за имотноправни работи, кои се само физички сместени во Општина Бутел, но тие сметаат дека сето тоа е во надлежност на локалната самоуправа. Инаку, во однос на пријавувањето на проблемите, дневно имаме во просек три-четири барања, а најчесто се однесуваат на дефекти во врска со уличното осветлување, прегорени светилки и слично – нагласуваат од локалната самоуправа на Бутел.
Она што можеби сега исто така станува многу актуелно е користењето на фејсбук-страниците на општините, каде што граѓаните пишуваат сѐ што сметаат дека треба да се реши.
– Во насока на отстранување разни проблеми, Општина Кисела Вода преку општинскиот фејсбук-профил и страницата на општината, секојдневно има комуникација со граѓаните. Најчесто бараат замена на прегорени светилки, пријавуваат несовесни граѓани што не се грижат за животната средина, кои одложуваат отпад на јавни површини, се интересираат за потребни документи и процедури, даваат предлози, прашуваат за планираните активности на општината и друго. По ова, граѓаните секогаш ги добиваат потребните одговори на нивните прашања и сите услуги за кои општината има можност и надлежност. За другите проблеми што не се во надлежност на општината, се прават силни напори да се најде решение и тие да бидат отстранети. Општина Кисела Вода во секое време им е на располагање на сите граѓани – децидни се надлежните.
Жителите, пак, на општината Ѓорче Петров најчесто се обраќале до градоначалникот, администрацијата или советот преку електронска пошта, но и на фејсбук-профилот на градоначалникот во приватна порака.
– Се користи и општинската страница, но поретко. Во најголем дел, прашањата се однесуваат на урбанистичките проблеми – велат од Ѓорче Петров.
На интернет-страницата на Општина Карпош, во рубриката „Пријави проблем“, на месечно ниво пристигнувале десет-петнаесет пријавувања на проблеми.
– Во врска со бројот на пријавени прашања и проблеми треба да се каже дека веб-страницата е само еден од десетината канали на комуникација што ги има општината и кои ги користи за двонасочна комуникација со граѓаните. Поточно, само на фејсбук-страницата на Општина Карпош на дневно ниво имаме десет-петнаесет пријавени проблеми и речиси исто толку и на инстаграм-платформата, како и на твитер-профилот. Најчесто, проблемите се поставуваат на „мЗаедница“, комуникациска платформа каде што добиваме од 20 до стотина пријавени проблеми месечно – информираат од Општина Карпош.
Притоа дообјаснуваат дека граѓаните сакаат да комуницираат директно со градоначалникот, па своите проблеми ги пријавуваат директно до него, на сите негови интернет-профили, па на неговите профили пристигнуваат над сто пријави и прашања на кои веднаш им се одговара. Дури и повеќе, доколку станува збор за некој актуелен проблем што ги засега повеќето граѓани, на само една објава, може да има и по 200 поставени прашања и исто толку одговори.
И јавните претпријатија активни во онлајн комуникацијата со корисниците
Во рамките на своите можности и надлежности, и јавните претпријатија исто така имаат онлајн комуникација со граѓаните за нивните прашања.
Во ЈП „Водовод и канализација“ онлајн комуникациските канали се користат сѐ почесто и повеќе, со оглед на големиот спектар онлајн услуги што претпријатието ги направи достапни за своите корисници.
– Прашањата и дописите од страна на граѓаните се однесуваат на сите услуги што ги дава претпријатието, а со оглед на имплементација на процесите за дигитализација, голем дел од побараните услуги се комплетира и по електронски пат – информираат од „Водовод и канализација“.
Јавното претпријатие „Комунална хигиена“ ја подготвува својата онлајн комуникација со граѓаните, па засега за сѐ што ги мачи пријавуваат на дежурниот телефон 3216 644.
– Во периодот јануари-јуни годинава имаме забележано 227 повици, од кои најголем дел се однесуваат на собирање и транспорт на комунален отпад од пластични канти (116 повици) и контејнери (47 повици). Би сакале да напоменеме дека имавме драстично зголемен број на јавувања за оваа проблематика за време на вонредната состојба (како и карантинските викенди), во март и април, кога претпријатието работеше со намалена динамика. Откако го вративме по старо работењето во три смени, забележавме и намалување на бројот на јавувања. Според досегашната практика, во текот на изминатите години најголем број јавувања сме бележеле за проблеми со бездомни кучиња (што веќе не е во наша надлежност) – велат од комуналното претпријатие.
Во јавното претпријатие „Паркови и зеленило“, пак, граѓаните најчесто се обраќале за интервенции по издадени решенија од страна на Град Скопје за сечење/кастрење дрвја, а дел пак од мејловите се однесувале и за појаснување на постапката.
-Често нѐ известуваат и не бараат за време на временска непогода, и тоа за паднато дрво и скршени гранки од дрвја, а сме имале интервенции каде што екипите со потребна механизација учествувале во спасување домашни миленици. Едно од прашањата за кои добиваме мејлови е и за несовесно расфрлен смет и отпадоци на јавните зелени површини и парковите, како и парк-шумата Водно и паркот на природата во Гази Баба, особено во летниот период, кога посетеноста е доста голема. Секако, пристигнуваат и мејлови што се насочени кон редовните активности што ги извршуваат екипите, за косење тревни површини, за кроење, полевање зеленило. Пристигнуваат и барања за уредување зелени површини- велат оттаму.
Проблемите со паркирањето и паркиралиштата не може да се заобиколат. Оттаму произлегуваат и заложбите на претпријатијата што се занимаваат со оваа проблематика за наоѓање современи начини за едноставно нивно детектирање и решавање. ЈП „Паркинзи на Општина Центар“ на почетокот на јуни ја пушти во употреба новата мобилна апликација, која им овозможува на граѓаните брзо и лесно да пријавуваат комунални проблеми на територија на општината Центар.
– Пријавувањето на комуналниот проблем се врши со испраќање фотографија на мобилната апликација и со помош на безбедна и прецизна геолокација вработените на Општина Центар и ЈП ПОЦ го лоцираат проблемот, алармираат за негово брзо решавање и испраќаат повратна информација штом тој ќе биде решен. Досега имаме повеќе од 90 пријави на комунални проблеми лоцирани на територија на општината Центар. Најчесто стигнуваат пријави за дупка на сервисна улица и оштетена урбана опрема – нагласуваат од ПОЦ.
Оние, пак, што користат јавен превоз често за своите проблеми и прашања бараат одговори на веб-страницата на ЈСП „Скопје“ и остваруваат комуникација со порака на фејсбук-страницата acebook.com/jspskopjee.
– Комуникацијата е достапна секој работен ден од девет до 15 часот, граѓаните добиваат повратен одговор во просек за 30 минути, најчесто и порано. Има прашања од секаков вид, прашуваат за цената на одреден тип билети, за начинот на валидација со мобилен телефон, бараат информации за возниот ред, за начинот/постапката за пријавување/барање за изгубен предмет. Исто така се информираат која е процедурата во случај на изгубена „скопска“, како да се извади нова, прашуваат за возен ред на одредена линија, за локации за дополнување на „скопска“. Секако, доставуваат поплаки за доцнење на одредена линија, а во актуелнава ситуација со ковид 19 се информираат за возниот ред и за работното време на билетарниците – велат од ЈСП.
