Соочени со енергетската криза која е во тек, а имајќи во предвид дека државата набавува електрична енергија со драстично повисока цена, како и во согласност со владината одлука за прогласена кризна состојба во енергетскиот сектор, сакаме да ја информираме јавноста дека Град Скопје побара раскинување на договорот со „Линк медиа плус“ дооел за новогодишно украсување на градот во вредност од 14.986.000 денари односно 243.000 евра, се наведува во соопштението од Град Скопје.
– Следната година, наместо досегашната практика на ненаменско трошење на парите на граѓаните и ангажирање на компанија за украсување, Град Скопје ќе набави украси кои ќе бидат сопственост на градот, со што ќе се заштедат значителни средства од градскиот буџет кои досега секоја година се трошеле за еднократен годишен закуп на овие украси – посочуваат градските власти.
Се додaва и дека ова е само прв пример за воспоставување на нова пракса на одговорно и транспарентно работење на градот, со која ќе биде ставен крај на неодговорното работење и трошење на градските буџетски средства.
