Градоначалникот на општина Центар, Саша Богдановиќ и рускиот амбасадор Сергеј Баздникин, денеска засадија 10 садници од видот јавор и со овој чин го најавија хортикултурното уредување на паркот и идејното решение за реконструкција на детското игралиште позади Универзалната сала.
Паркот ќе биде именуван како „Парк на сеќавањето“, а општина Центар, овој простор го посветува на Руската федерација во знак на пријателство и во чест на одбележување на 75-годишнината од победата над фашизмот.
– Благодарност до рускиот амбасадор Сергеј Баздникин и до Руската федерација за поддршката на активностите на општина Центар и преку овој симболичен чин сакаме да пратиме пријателска порака која ќе остане во сеќавање на граѓаните и идните генерации – изјави градоначалникот Богдановиќ.
Во мај годинава, општина Центар со поддршка од руската амбасада постави нов споменик, лоциран на реконструираната улицата 9 Мај во Центар, во чест на милионите војници кои пожртвувано ги дадоа своите животи во војната, за повторно враќање на светскиот мир, слободата и демократијата.
