Министерството за здравство најави дигитални новини во системот за следење на заразните болести, откако на електронскиот национален регистар на прописи ЕНЕР беа објавени измените и дополнувањата на Законот за заштита на населението од заразни болести.
Со законските измени се проширува листата на заразни болести што подлежат на задолжително пријавување, а се унапредува и функционирањето на системот АЛЕРТ 2.0 – синдромски механизам за брзо известување и рано предупредување врз основа на симптомите и клиничките знаци кај пациентите.
Една од клучните новини е воведувањето електронски систем за пријавување на заразни болести, со што процесот ќе се дигитализира и ќе се забрза размената на информации меѓу здравствените институции.
Министерот за здравство, Азир Алиу, појасни дека измените предвидуваат и дополнителна заштита на личните податоци преку користење интернет платформи и паметни апликации, со цел да се намали ризикот од неовластен пристап до чувствителни информации.
Со новите законски решенија се воведува и обврска за континуирана едукација во областа на дезинфекција, дезинсекција и дератизација (ДДД), која ќе ја спроведува Институтот за јавно здравје. Дополнително, се проширува листата на патогени и се предвидува информатичко поврзување на микробиолошките лаборатории за поефикасно следење на заразните заболувања.
Целта на измените е побрза детекција, подобра координација и поефикасен одговор при појава на заразни болести на национално ниво.
