Во тек е поставувањето на првите хибридни колектори на јавен објект во надлежност на локалната самоуправа. Општина Карпош ги поставува овие модули на покривната површина на градинката „Мајски цвет“ (објект „Јасмин“), во населбата Тафталиџе 2.
Овие колектори, преку искористувањето на сончевата енергија, ќе произведуваат 300 литри санитарна топла вода, која ќе се користи за потребите на кујната на оваа детска установа.
– Колекторите заменуваат четири електрични бојлери од 80 литри. Исто така, тие ќе произведуваат 3,2 киловати струја за градинката, а вишокот електрична енергија, преку двонасочно броило, ќе се предава на мрежата на ЕВН – информираат од Општината.
Од оваа година граѓаните на Општина Карпош ќе можат и самостојно да ги проверуваат техничките и финансиските аспекти и поволности од промената на системот на греење во своето домаќинство. Веќе се работи на софтверско решение, со кое преку веб-страницата на Општината ќе биде достапна оваа можност.
