Некогаш полноводната и бистра река Студенчица, во чии води можеше да се улови најквалитетната речна пастрмка „Салмо Македоникус“, за жал деновиве нејзиното корито е целосно исушено во должина од близу три километри. Дефицитот на вода во речното корито, секако целосно ќе го промени биодиверзитетот на оваа река и прашање е колку години ќе треба, барем делумно да се врати во нормала живиот свет во Студенчица.
Од ЈПВ „Студенчица“, претпријатие што стопанисува со оваа река и од каде со вода за пиење се снабдуваат над 160 000 жители од повеќе општини во југозападниот дел од земјава, тврдат дека целосно го почитуваат договорот за хидробиолошки минимум на реката и дека редовно во речното корито се испуштаат најмалку 50 литри вода во секунда, а изминативе триесетина дена количините беа многу поголеми и изнесуваа околу 120 литри.
– Она што е договорено во реката да се испуштаат најмалку 50 литри вода во секунда за хидробиолошки минимум, нашата компанија во целост го почитува и следејќи ги секојдневните параметри, можам одговорно да потврдам дека не 50 литри, туку во речното корито се испуштаат повеќе од 100 литри вода во секунда, а што дел од речното корито исушено, причината лежи во понирањето и испарувањето на водата, на што ние како компанија не можеме да делуваме – вели Гоце Наќески од ЈПВ „Студенчица“.
Рибарите се крајно разочарани и револтирани бидејќи најчистата река во регионот остана без капка вода и, којзнае уште колку време треба да помине во коритото на оваа река да протечат првите количества на вода, но во тој случај некогаш пребогата река со жив свет ќе биде безживотна.
Инаку во моментов штедроста на изворот Студенчица изнесува околу 800 литри и од компанијата потврдуваат дека околу 700 литри вода во секунда се упатуваат кон водокорисниците, додека минимум 100 литри вода во секунда се испуштаат во речното корито преку малата хидроцентрала, а бидејќи РЕК „Осломеј“ е надвор од погон, за хидробиолошки минимум остануваат поголеми количества на вода од договореното.
З.А.
