Во Офицерскиот дом во Битола се одржа проштална средба на градоначалничката на Битола, Наташа Петровска, со Грчкиот конзул Ахилес Ракинас. Средбата се одржа во Офицерскиот дом, како локација која отсекогаш го отсликувала космополитскиот дух на Битола. Во оваа пригода, Конзулот ѝ подари на градончалничката врамен текст од страница од весник од 1936 година, во кој пишува за возвратна посета на Битола на 95 наставници, заедно со директорот на Гимназијата од Флорина.
Главниот настан, проследен со вечера и музика се одржал во Офицерскиот дом и како што се наведува во текстот „во присуство на генералот Димитријевиќ, градоначалникот, подуправителот на Битола, директорот на Гимназијата и директорот на полицијата на градот, кои размениле здравици со претседателот на здружението на работници во основното образование, г. Василикопулос, со генералот, со директорот на гимназијата во Флорина г. Аставес, со што се забележани взаемните чувства на почит и љубов помеѓу двата народи“.
Градоначалничката Петровска го запозна конзулот со градежните активности што се изведуваат во изминатите години на оваа локација, како и за текот на партерното уредување.
Инаку да потсетие Офицерскиот дом се реконструира со средства кои Општина Битола, на иницијатива на градоначалничката Петровска ги обезбеди со проект за којшто доби средства од Европската Унија во рамките на грантовата шема на Проектот за локална и регионална конкурентност (ПЛРК)“, финансиран од ИПА 2 -инструментот за претпристапна помош на ЕУ и ко-финансиран од Владата на Република Македонија, администриран од Светска банка, во вредност од околу еден милион евра.
М.М.
