Обраќање на Су Леи, вршител на должноста амбасадор на НР Кина во Македонија, по повод 76-годишнината од основањето на Народна Република Кина
Кинеската амбасада во Македонија вечерва одржа прием во хотелот „Мериот“ во Скопје по повод одбележувањето на 76-годишнината од основањето на Народна Република Кина и одбележување на 80-годишнината од победата на Кинеската народна војна на отпор против јапонската агресија и Светската антифашистичка војна. На приемот беа присутни бројни гости од политичкиот, културниот и јавниот живот, кои со внимание го проследија обраќањето на Су Леи, вршител на должноста амбасадор на НР Кина во Македонија, во кое тој ги истакна напредокот и постигнувањата на Кина во повеќе области, како и продлабочувањето на односите помеѓу Кина и Македонија. Во продолжение го пренесуваме неговиот говор интегрално.
Ми претставува големо задоволство тоа што денес се собравме свечено да ја прославиме 76-годишнината од основањето на Народна Република Кина и заедно да ја одбележиме 80-годишнината од победата на Кинеската народна војна на отпор против јапонската агресија и Светската антифашистичка војна. Посакувам топло добредојде и искрена благодарност до пријателите од сите сфери на животот кои се грижат за развојот на Кина и ја поддржуваат каузата за пријателство меѓу Кина и Северна Македонија.
Оваа година се одбележува 76-годишнината од основањето на Народна Република Кина, како и последната година од имплементацијата на 14-тиот Петгодишен план (2021-2025). Под силното водство на Централниот комитет на Комунистичката партија на Кина, на чело со другарот Си Џинпинг, Кина постигна револуционерен напредок, трансформативни промени и историски достигнувања во својот економски и социјален развој.
За време на 14-тиот Петгодишен план, Кина стабилно напредуваше во висококвалитетен развој и го зајакнуваше растот поттикнат од иновации. Кумулативното економско производство во текот на изминатите пет години се очекува да надмине 35 трилиони јуани, а прогнозата за БДП оваа година е да достигне приближно 140 трилиони јуани. Придонесот на Кина кон глобалниот економски раст остана околу 30 отсто. Револуционерните технологии како што се големиот јазичен модел на вештачка интелигенција Дипсик и хуманоидните роботи привлекоа глобално внимание. Во моментов Кина е домаќин на најголемиот број од 100-те најдобри глобални кластери за научни и технолошки иновации, со забрзана интеграција на технолошките и индустриските иновации, поттикнувајќи го брзиот раст на новите квалитетни продуктивни сили.
Кина, исто така, постигна извонреден напредок во унапредувањето на зелената трансформација. Стапката на покриеност со шуми достигна над 25 отсто, што ја прави Кина најголемиот придонесувач кон нови зелени површини на глобален план, сочинувајќи една четвртина од вкупниот број. Инсталираниот капацитет на нова енергија, за прв пат во историјата, го надмина оној на енергијата од јаглен. Кина го изгради најголемиот систем за производство на чиста енергија во светот, со инсталиран капацитет на обновлива енергија што достигнува 2,09 милијарди киловати, што значи дека еден од секои три киловат-часови потрошена електрична енергија доаѓа од зелена енергија. Направени се големи чекори во унапредувањето на еколошката цивилизација. Со бујни планини и бистри води, платното на Кина е уште поубаво насликано.
Кина продолжува да ја подобрува благосостојбата на луѓето, преку континуирано подобрување на квалитетот на животот. Во текот на изминатите пет години, се креираат повеќе од 12 милиони нови урбани работни места годишно. Просечниот животен век достигна 79 години. Кина го изгради најголемиот систем за образование, систем за социјално осигурување и систем за здравствена заштита во светот. Стапката на задржување во задолжителното образование и стапките на покриеност за основно пензиско и здравствено осигурување надминуваат 95 отсто, а плодовите на економскиот развој на Кина и научниот и технолошкиот напредок се одразуваат како посилно чувство на исполнетост, среќа и безбедност за кинескиот народ.
Дами и господа, пријатели, оваа година се одбележува и 80-годишнината од победата на Кинеската народна војна на отпор против јапонската агресија и Светската антифашистичка војна, како и 80-годишнината од основањето на Обединетите нации. Пред осумдесет години, по 14 години храбра борба, кинескиот народ постигна целосна победа над јапонските милитаристички агресори, што ја означи целосната победа на Светската антифашистичка војна. Овој голем триумф беше резултат на борбата на кинескиот народ рамо до рамо со антифашистичките сојузници и народите на сите нации и означи историска пресвртница за светот.
Денес, осумдесет години подоцна, меѓународниот пејзаж е обележан со испреплетени промени и турбуленции, а глобалните предизвици продолжуваат да растат. Обединетите нации и мултилатерализмот се под притисок, а дефицитот во глобалното управување се продлабочува. Како одговор на тоа, претседателот Си Џинпинг ја предложи Иницијативата за глобално управување (ГГИ), застапувајќи ги основните принципи на почитување на суверената еднаквост, почитување на меѓународното владеење на правото, практикување на мултилатерализмот, застапување на пристапот фокусиран на луѓето и фокусирање кон преземање реални дејствија. Таа нуди кинеско решение за заштита на меѓународниот поредок и подобрување на глобалното управување.
Оваа година се одбележува и 80-годишнината од обновата на Тајван. Враќањето на Тајван на Кина е важен дел од меѓународниот поредок по Втората светска војна. Историските и правните факти дека Тајван е дел од Кина се неспорни. Авторитетот на Резолуцијата 2758 на Генералното собрание на Обединетите нации не треба да се оспорува. Целосното национално обединување е заедничка аспирација на целиот кинески народ. Како што изјави претседателот Си Џинпинг, „Големото подмладување на кинеската нација е неодоливо! Благородната кауза за мир и развој на човештвото ќе победи!“
Дами и господа, пријатели, во текот на изминатата година, под стратешко водство на лидерите на Кина и Северна Македонија и со поддршка и ангажман на луѓе од сите сфери на животот, односите меѓу Кина и Северна Македонија стабилно се продлабочуваа во сите области, вклучувајќи ја политиката, економијата, трговијата, културата и соработката меѓу локалните заедници. Пријателските односи станаа подлабоко вкоренети во срцата на луѓето.
По повод Денот на независноста на Северна Македонија, претседателот Си Џинпинг и премиерот Ли Чијанг испратија честитки до претседателката Гордана Сиљановска Давкова и до премиерот Христијан Мицкоски. Веднаш по пожарот во Кочани, членот на Политбирото на ЦК на КПК и министер за надворешни работи Ванг Ји, веднаш изрази сочувство до министерот за надворешни работи Тимчо Муцунски. Размените на високо ниво дополнително ја зајакнаа меѓусебната доверба и пријателство меѓу нашите две земји.
Автопатот Кичево-Охрид во Северна Македонија, кој го гради кинеска компанија, напредува брзо, а неколку делници се веќе отворени за сообраќај. Оваа година, над десет фирми од Северна Македонија учествуваа на четвртиот Саем Кина-ЦИЕ, дополнително зголемувајќи ја препознатливоста на производите од Северна Македонија на кинескиот пазар.
Откако Кина спроведе еднострана политика за безвизен режим за Северна Македонија, сè поголем број граѓани на Северна Македонија патуваат во Кина за бизнис и туризам. Нашата продуктивна економска соработка продолжува да носи видливи придобивки за двата народи, а меѓучовечката размена внесува виталност во меѓусебните односи. Искрено се надеваме дека што повеќе пријатели од Северна Македонија ќе придонесуваат за пријателството меѓу нашите две земји и ќе продолжат да пишуваат нови поглавја во нашите билатерални односи и соработка во различни области.
Како заклучок, да посакаме континуиран просперитет на Кина и Северна Македонија, нека пријателството меѓу нашите две земји трае со генерации, и нека сите наши гости и семејства уживаат во добро здравје и среќа! Ви благодарам.
