Премиерот Христијан Мицкоски кој присуствува на светскиот економски форум во Давос, вечерва, преку својот фејсбук профил, соопшти дека денеска имал билатерална средба со претседавачот на Советот на министри на Босна и Херцеговина, Борјана Кришто, а потоа остварил и многу билатерални средби со мултинационални компании.
Мицкоски, како што информира преку видео-изјава, учествувал и на панел. Зборувал за проекти од областа на енергетиката и прв пат ги прзентирал „Бошков Мост“ и „Чебрен и Галиште“.
-Денот го почнавме со билатерална средба со Борјана Кришто којашто е претседавач на Советот на министри на Босна и Херцеговина, а потоа го продолживме со многу билатерални средби со мултинационални компании коишто навистина значат многу во делот на бизнисот во светот. Имавме и успешен панел на кој зборував за проекти што за нас се значајни, проекти што опфаќаат производство на електрична енергија, подобрување на преносните капацитети на интерконекторите кои пренесуваат електрична енергија и гас. Денес за првпат на панелот ги прзентирав за нас клучните проекти кои во периодот што следи ќе ги објавиме, а тоа се „Бошков Мост“ и „Чебрен и Галиште“. Убеден сум дека привлекоа големо внимание кај голем број инвеститори. По завршувањето на панелот тие ми пристапија и разменивме контакти. Ги поканив да дојдат во Македонија, да ги презентираме потенцијалите со кои располагаме и инвестициските можности – потенцира премиерот во изјавата.
Тој е убеден дека овие проекти ќе бидат успешни, дека ќе додадат вредност во домашната економија, како и во квалитетот на животот на македонските граѓани.
На панелот станало збор за темите кои, како што вели Мицкоски, се клучни во Давос – вештачката интелигенција, дата центрите и електричната енергија.
-Разговаравме повторно со луѓето кои навистина нешто значат во светот на вештачката интелигенција, водечки фирми во светот во делот на стопанисувањето со дата центри, но и за предизвиците – што значи и за колку треба да биде зголемено производството на електрична енергија во светот во годините што следат – додава Мицкоски.
Премиерот најавува учество на уште еден панел на кој ќе ги претстави инвестициските можности на Македонија пред друга група инвеститори.
-Убеден сум дека и овој панел ќе биде успешен. Следете не, го продолжуваме престојот во Давос, а утре се гледаме во Скопје – порачува премиерот Мицкоски.
