Центарот за управување со кризи (ЦУК) утрово информира дека нема активно горење на пожарот кај Богданци, но пожарот сѐ уште не е ставен под контрола.
-Во овој момент нема активно горење на пожарот кај Богданци, чад има на повеќе места и пожарот сѐ уште не е ставен под контрола- велат од ЦУК.
Појаснуваат дека пожарникарите од Гевгелија, Валандово, Кавадарци и Штип, заедно со тим од ДЗС, Национални шуми и јавното комунално претпријатие од Богданци, се обидуваат да го заобиколат пожарот од сите страни за да го изгаснат.
На терен, според информациите од оваа институција се вкупно околу 65 лица како и градоначалникот на Богданци, Блаже Шапов.
Според ЦУК, доколку во подоцнежните часови дојде до разгорување на пожарот на располагање стојат три Ер трактори на ДЗС како и два хеликоптери на МВР.
Засега нема опасност по населението, велат надлежните.
