НЕЗАДОВОЛНИ ОД НОВИТЕ ПРОТОКОЛИ
Независната угостителска комора (НУК) најави дека доброволно ќе ги затвори сите објекти на две недели во знак на незадоволство од најновите протоколи предложени од Комисијата за заразни болести, а донесени од Владата.
– Не ни требаат крпеници од протоколи, доброволно ќе ги затвориме објектите на две недели. Но што ако ковид-бројките и натаму растат? Дали Филипче и Караџовски ќе имаат доблест и смелост да им се извинат на угостителите, да ја надоместат штетата и јавно да признаат дека угостителските објекти не се причина за зараза туку оправдание за избегнување на одговорноста на погрешните мерки и генерални препораки за спречување на ширењето на коронавирусот – наведува претседателот на комората Здравко Јосифовски.
Според НУК, новите ограничувања нема да го решат зголемениот број на заболени, туку ќе ги поттикнат младите и гостите на угостителските објекти да бараат алтернативни решенија на дружење и забава, како што се групни и масовни собирања на приватни забави, по паркови, паркинзи и возила, без никаква контрола и никакви механизми за заштита од коронавирусот.
