Според информациите од набљудувачите и регионалните координатори, отворени се сите гласачки места на кои МОСТ има распоредено свои набљудувачи, освен гласачкото место 2344 во општина Студеничани. Лицето кое имало клуч од просторијата во која е сместено ГМ одбивало да ја отклучи. Останатите набљудувачи се на избирачките места и досега не забележале проблеми при набљудувањето на процесот, соопштија од Граѓанската асоцијација МОСТ.
МОСТ го следи денешното гласање за избор на претседател на државата, како и на неколку места за избор на градоначалник, со повеќе од 1.500 набљудувачи.
– Набљудувачите на МОСТ се статични, и ќе го следат процесот на гласање во текот на целиот ден. Покрај тоа, МОСТ има распоредено и 100 мобилни тимови, составени од по двајца набљудувачи, кои ќе служат за логистичка поддршка на статичните набљудувачи и повремено ќе ги набљудуваат местата на кои МОСТ нема распоредено статични набљудувачи. Дополнително, 80 набљудувачи ќе ја набљудуваат работата на општинските изборни комисии, а ќе се набљудува и работата на Државната изборна комисија, соопштија од МОСТ.
