Одличните билатерални односи, можностите за зајакнување на соработката во повеќе области од заемен интерес, но и безрезервната поддршка на Словенија за интегрирањето на Македонија во ЕУ и НАТО биле теми на денешната средба во Скопје на шефот на македонската дипломатија Никола Димитров и словенечкиот министер за одбрана Карл Ерјавец.
Димитров, како што соопшти МНР, го запознал Ерјавец со процесот на спроведување на Преспанскиот договор и претстојните чекори на овој план.
Нагласил дека Република Македонија од секогаш ја уживала безрезервната поддршка од Република Словенија во исполнувањето на своите надворешно политички приоритети, особено на планот на интеграцијата во НАТО, посочувајќи ја важноста на словенечката амбасада во Скопје, која од оваа година е контакт амбасада за НАТО.
Ерјавец упатил честитки до Димитров и Владата за направениот исчекор на земјата од нивното стапување на функција и нагласи дека Словенија го поддржува НАТО интегративниот процес на земјава и дека ќе стори се за тој процес да биде успешен. Тој ја потврдил традиционално добрата соработка меѓу двете земји во областа на одбраната, како и подготвеноста на Словенија за натамошно пренесување на словенечките искуства од пристапувањето кон ЕУ.
