Премиерот Христијан Мицкоски останува на ставот дека не очекува зголемување на цената на струјата, но доколку дојде до тоа, тогаш, според него, зголемувањето би било од еден до три проценти. Ваквите очекувања Мицкоски ги темели на постепената консолидација на ЕСМ што е направена во изминатите четири-пет месеци, состојбата со количествата јаглен, набавката на природниот гас…
– Во четири-пет месеци направивме чудо да ја консолидираме ЕСМ за да не дојде до зголемување или ако дојде до тоа, да биде во рамките на два-три проценти. Тоа е навистина успех кога една компанија, која во 2017 година имаше милијарда денари депозити во банки и околу 360-370 милиони на сметка, без долгови, а за седум години беше уништена и во периодот што следува јавноста ќе биде запознаена што сѐ е правено, за помалку од четири месеци да ја консолидирате – на депонија да имате околу 200-250 илјади тони јаглен, се увезува јаглен по 10, 15, 20 отсто пониски цени, да договорите цена на природен гас што нема да биде берза плус 11 евра, туку берза плус четири евра, а по Нова година очекувам и тоа да поевтини…. Кога ќе ги подготвите сите овие активности, тогаш доаѓаме до она што го говорам дека не очекувам да има зголемување од 10, 15 или 20 проценти, како што е тоа случај во многу држави од регионот и Европа. Очекувам, ако има зголемување, тоа да биде незначително во рамките од еден до три проценти – рече Мицкоски.
Тој очекува ЕСМ да биде целосно консолидирана на крајот на 2025 година или почетокот на 2026 година. В петок се очекува ЕСМ да ја достави својата понуда до Универзалниот снабдувач, по што треба да биде донесена одлука за цената на електричната енергија. Н.М.
