Трагедијата во Кочани повика на сериозен пристап кон заштитата и сигурност на граѓаните во сите сфери на општественото живеење
Трагедијата во дискотеката „Пулс“ во Кочани остави длабоки траги во сите сфери на нашето живеење. Целата држава сочувствува со најблиските на загинатите и им посакува што побрзо закрепнување на повредените. Од друга страна, оваа незапамтена трагедија ги разбуди размислувањата за нашата безбедност во сите јавни простори, нешто што досега како да било оставано во втор план, како да тоа било нечија туѓа грижа, без притоа да се води сметка за прописите и протоколите. Доволно беше само една инспекциска контрола на надлежните служби за околу две недели за да се утврди дека само минимален дел од угостителските објекти и простори за забава ги исполнуваат критериумите за противпожарна заштита. Трагедијата во Кочани го промени размислувањето на граѓаните за потребата од противпожарни апарати, но и одржување на хидрантската мрежа.
Според она што го презентираа надлежните, инспектори на Дирекцијата за заштита и спасување, заедно со Државниот пазарен инспекторат и МВР извршија проверка на угостителските објекти. Притоа се извршени 73 инспекциски надзори, при што се наложени мерки за констатираните недостатоци. Инспекторите напишале 36 казни за правно лице и 36 казни за одговорно лице во правното лице, како и 24 забрани за користење на објектите.
Георгиевски: Ултрасериозен пристап кон противпожарната заштита
Констатацијата дека состојбата на теренот воопшто не е охрабрувачка ја потврдуваат и луѓето со завидно искуство во областа на противпожарната заштита и заштитата при работа во големите индустриски комплекси. Еден од нив е Нове Георгиевски, кој долги години беше прв човек на секторот за заштита при работа и противпожарна заштита на „Макстил“. Денес иако пензионер, тој и натаму ревносно ги следи и анализира состојбите во овој сектор.
– Жално е ова што се случи во Кочани, човек нема зборови по една ваква трагедија во која загинаа млади луѓе. Едноставно сакам да укажам дека она што досега е познато би требало сериозно да влијае на нашето однесување кон противпожарната заштита. Од моето искуство можам да кажам дека тоа е област што никако не смее да се потцени и кон која треба да се однесуваме максимално професионално и со должна почит кон сите опасности што нѐ демнат во работните простории. Не би сакал да звучам застрашувачки, но од моето искуство и од контактите со колегите од разни компании знам дека ретко каде ѝ се посветува должно внимание на оваа област. Најдобар доказ за тоа е наглото зголемување на набавка на противпожарни апарати и ревизија на системите на заштита, пред сѐ на хидрантската мрежа. Се чини дека трагедијата во Кочани нѐ освести дека не смееме да ја потценуваме опасноста што нѐ демне ако не сме доволно внимателни – вели Георгиевски.
Нашиот соговорник ни пренесува и дел од комуникацијата со неговите колеги од поголемите трговци со противпожарна заштита. Имено, според нивните зборови, по трагедијата во Кочани се случи сите одеднаш да стануваат свесни за потребата од воспоставување противпожарен систем со сите протоколи. Тоа, пак, предизвика продавниците одеднаш да не можат да постигнат да ги задоволат сите побарувања. Резервите се потрошени, па сега се вршат дополнителни набавки за да се снабдат сите што го бараат тоа.
Но, нашиот соговорник ни укажува и дека сме сведоци на една ситуација што наведува на сериозно размислување. Имено, според она што е достапно деновиве на јавноста, не е доволно само да се набават потребните апарати и да се воспостави системот.
– Пожарот во Кочани отвори уште едно сериозно прашање, кое бара сериозен пристап. Имено, видовме дека еден од актерите во несреќата се обидел да го гаси пожарот, но со сосема погрешен ПП-апарат. Имено, секој што им пристапува на овие уреди треба да има барем основни познавања, да не речам и обука за нивно користење. Дополнително, ние како нација немаме барем основни обуки или барем напатствија за постапување во случај на пожар. Верувам дека да беше тоа така, бројката на трагично загинатите ќе беше драстично помала. Но, тоа се веќе теми за размислување на надлежните – вели нашиот соговорник.
За крај, како порака од човек што долги години се грижел за безбедноста на еден стопански гигант, Георгиевски укажува на неопходноста од поставување безбедносни протоколи и нивно стриктно придржување. Само на тој начин можат да се избегнат жртвите во вакви несреќни случаи или барем да се сведат на минимум. П.Р.
