Инсистирањето на одбраната да побара изземање на судијата се базира токму на фактот дека „во минатото тој веќе го искажал својот став токму околу Давидовски, а за тоа постојат и официјални судски записници, а јавноста е запознаена и со видеозапис“. Нашите брифери, универзитетски професори, инсистираат на констатацијата дека токму „судската независност и непристрасност се есенцијални за функционирање на правдата“!
Започна судскиот процес против Дејан Давидовски-Дешо, обвинет за упадот во Собранието на 27 април 2017
Адвокатите на Дејан Давидовски-Дешо, обвинет за упадот во Собранието на 27 април 2017, побараа изземање на судијата Илија Трпков поради пристрасност. Како што истакна адвокатот Тони Менкиновски, судијата, кога ја донел ослободителната пресуда за организаторите на упадот во Собранието, во тогашната изјава имал толкувања за настанот, поради што не се очекува праведен процес за Давидовски.
Како што е познато, Давидовски доби политички азил во Шведска поради политички прогон во времето на владата на Заев, за што процена даде шведскиот врховен суд. Тој пред неколку месеци се врати во Македонија и сега започна судскиот процес против него.
Инсистирањето на одбраната да побара изземање на судијата се базира токму на фактот дека во минатото тој веќе го искажал својот став околу Давидовски. Неговиот адвокат Тони Менкиноски вели дека Трпков е инфициран кога е во прашање овој случај.
– Денеска судијата беше зачуден, но ние му доставивме докази, му доставивме ЦД-снимка и на УСБ, во која очигледно се гледа дека тој е инфициран и има заземено став во врска со овој предмет, кој треба да го суди денеска, а е пристрасен – изјави Менкиноски.
Одбраната изрази надеж дека Кривичниот суд ќе го прифати нивното барање. Според нив, Трпков веќе постапувал во предметот „Организатори на 27 април“ и веќе се обидел да осуди лица за кривичното дело „терористичко загрозување на уставниот поредок и безбедноста“. Тие велат дека ова создава сомнеж за негова пристрасност и не дава никаква гаранција за фер постапка за обвинетиот.
– Ова е предмет каде што шведскиот врховен суд има одлучено дека се работи за политички азил, значи се работи за постапка што претходела на постапката во Македонија, притоа дал негативно мислење и смета дека одлуката за која се товари не е тероризам – изјави Менкиноски.
За потсетување, судијата Трпков во своето образложение при одлуката за амнестија на обвинетите за случајот „Организатори на 27 април“ даде свој личен став околу статусот на Давидовски за овој предмет, со што јасно се доведува во прашање неговата непристрасност, на што се базира барањето на одбраната.
– Каков ќе беше одговорот на системот ако вакви настани со тепање парламентарци, кршење и демолирање се случеа во Парламентот на Шведска и на Грција? Можеме само да замислиме, но сигурно без разлика дали ќе беше третиран како терористичко загрозување на нивниот систем, одговорот ќе беше брз, експедитивен и ќе имаше судска завршница – кажа судијата Трпков на 23 јануари годинава.
Шведскиот врховен суд пред неколку години не го прифати барањето на македонските власти да го испорача Дејан Давидовски-Дешо, со образложение дека тој е жртва на политички прогон, бидејќи наместо за протест, обвинет е за тероризам.
П.Р.
