Со новото поврзување на охридскиот аеродром со еден ваков систем како што е истанбулското воздушно пристаниште придобивките може да бидат огромни. На тој начин Охрид, Струга и сите места што гравитираат кон охридската ривиера стануваат многу поблиски и подостапни за сите оние што претходно требало да бараат заобиколни летови за да стигнат до овој регион, што ги отежнуваше кој било проект, идеја или замисла за бизнис
Реакции за воспоставување на новата авиолинија Истанбул – Охрид
Деновиве со промотивниот лет на „Туркиш ерлајнс“ од Истанбул беше промовирана новата авиолинија Охрид-Истанбул. Првите туристи што допатуваа со промотивниот лет симболично означуваат нова ера во туристичката понуда на охридската ривиера, но од новото сообраќајно поврзување се очекуваат придобивки на повеќе полиња.
Се разбира, најголемо значење новата авиолинија ќе има со тоа што Охрид не само што ќе стане дестинација за многубројните туристи од Турција, кои и изминативе години претставуваат значајна бројка во вкупниот биланс, туку преку Истанбул ќе се поврзе буквално со целиот свет. Само за илустрација, бројката на турските туристи е двојно поголема во однос на оние од Србија, кои се втори по застапеност на охридското крајбрежје.
Дополнително, треба да се истакне дека Истанбул има еден од најголемите европски аеродроми со повеќе од 300 дестинации, кој само лани нагости околу 80 милиони патници. Со новото поврзување на охридскиот аеродром со еден ваков систем како што е истанбулското воздушно пристаниште придобивките може да бидат огромни. На тој начин Охрид, Струга и сите места што гравитираат кон охридската ривиера стануваат многу поблиски и подостапни за сите оние што претходно требало да бараат заобиколни летови за да стигнат до овој регион, што ги отежнуваше кој било проект, идеја или замисла за бизнис
– Новата директна авиолинија Охрид-Истанбул значи многу и за нас туроператорите, бидејќи сега можеме да им ги понудиме Охрид и езерото во пакет со цела Западна Македонија под многу поповолни услови. Зборуваме за скусување на времето за патување, бидејќи се избегнуваат поврзувачки летови, а и ќе ги избегнеме многубројните забелешки за лошото поврзување по сувоземен пат, било до Скопје, а така и до соседните држави. Така што мислам дека ова е полн погодок за сите оние туристи од странство што со години се обидувавме да ги привлечеме во Охрид и во Струга, но нашите странски партнери го избегнува тоа поради лошата сообраќајна поврзаност – вели Дончо Нацев, сопственик на една од најстарите и најреномирани туристички агенции кај нас. П.Р.
