За да се постигне договор со Бугарија потребни се гаранции од Брисел за јазикот, специфичноста на народот и да се обврзат да не ја блокираат повеќе земјава кон ЕУ, кажа претседателот на ВМРО-ДПМНЕ Христијан Мицкоски во вечерашното гостување во централниот дневник на телевизија „Сител“.
– Велам ќе почнат притисоците, ќе почнат повторно притисоците врз пратениците, ќе почнат притисоците врз луѓето кои што се внатре, ќе почнат девалвирањето на тој парламент итн. И како што е сценарио видено веќе во минатото. И затоа јас велам јас го прифаќам сиот товар врз себе да ги заштитиме тие луѓе кои што се во парламентот, да го заштитиме нивното достоинство, да ги видиме оние гаранции од Брисел и после можеме да разговараме за секакви договори – истакна Мицкоски.
Тој додаде дека во овој момент и во иднина како што стојат бројките и расположението на граѓаните таков договор каков што планира да го потпише Ковачевски нема да биде успешно поминат во Парламентот.
– И одбивам да бидам прогласен ако не го поддржам тој договор за анти ЕУ. Прво, на маса сакам да видам гаранции бидејќи и Петков бара, барам и јас гаранции. Да видам гаранции за мајчиниот мој јазик, македонскиот, да видам гаранции за мојот народ македонскиот дека има своја историја вековна, традиција, култура, обичаи, и конечно трета една гаранција дека никогаш повеќе никој нема за вакви глупости нас да не попречува да станеме земја членка на ЕУ – нагласи лидерот на ВМРО-ДПМНЕ.
Мицкоски посочи дека ВМРО-ДПМНЕ понуди заеднички со власта да седнат на иста маса и да изградат заеднички став во врска со проблемот со Бугарија.
