Македонскиот дипломатски синдикат (МДС) преку отворено писмо до шефот на македонската дипломатија Бујар Османи укажува на кршење на законот за надворешни работи, при неодамнешна турнеја на министерот во рамки на која тој ги посети дипломатско-конзуларните претставништва во Бон (Германија), Берн (Швајцарија), Венеција (Италија) и во Виена (Австрија). Во продолжение го пренесуваме отвореното писмо на МДС до Османи.
Министре, веќе стана редовна пракса да ви укажуваме на флагрантното кршење на законот за надворешни работи од ваша страна, како што беше упатувањето на генералниот конзул во Њујорк за што сѐ уште чекаме на одговор врз кој принцип го номиниравте за престижната позиција, но сега влегувате во нова фаза на своеволно документирано кршење на закони и колективен договор.
Сакаме да ви потенцираме дека вашата вонредна контрола на амбасадите и конзулатите и документирањето на овој процес со цел да се потенцира вашата „загриженост“ за ефикасноста на работата на ДКП-та е целосно неприфатлива и противзаконска. Вашата министерска позиција не ви дава право на увид во сѐ уште неиздадени лични документи и е во целосна спротивност на законот за заштита на личните податоци, уште повеќе што истото е објавено јавно, на вашиот фејсбук-профил.
Дополнително, сакаме да ви укажеме дека давање инструкции за работа во смени како и работа во викенд е во целосна спротивност со законот за надворешни работи како и колективниот договор за јавната администрација.
На крајот сите се залагаме за македонските државјани да добијат документи час поскоро, но од сите информации во јавноста јасно е дека во државата нема обрасци за издавање на истите. Со оглед на ова, колку и да се форсираат колегите да работат во смени, викенди па дури и 24 часа, истото е целосно залудно и ќе биде само во насока на разгорување на проблемот со доведување на странките во заблуда и креирање на дополнителна нервоза и притисок врз вработените во амбасадите и конзулатите.
Ве повикуваме да се прекине со оваа пракса на само промоција и перманентно кршење на законите кои ја дефинираат и штитат дипломатската служба.
