Битола
Oпштина Битола инвестира во училиштата, реализирајќи крупни инфраструктурни проекти. Во средното училиште „Таки Даскало“ се работи на изградба на фотоволтаична централа, со јачина од 40 kW, која е поставена на покривната конструкција на училиштето. Вкупната вредност на проектот изнесува 1.876.251 денари велат од Општината.
– Со реализацијата на овој капитален проект, училиштето целосно ќе ги задоволува своите потреби за електрична енергија, а вишокот на произведената електрична енергија ќе ѝ се продава на фирма со која училиштето има склучено договор за набавка на електрична енергија. Со овој проект се придонесува за поголема енергетска ефикасност и заштита на животната средина, затоа што електричната енергија се произведува од енергетски обновливи извори – велат од училиштето.
Покрај овој капитален проект, со средства на локалната самоуправа се набавени и нова информатичка и видеоопрема, во вредност од 408.870 денари, 19 телевизори, како и компјутерска опрема – 18 персонални компјутери, една паметна табла во вкупна вредност од 448.629 денари, а набавен е и нов училиштен мебел во вредност од 285.914 денари. Со овие вложувања, како и со претходните, во изминатите години училиштето комплетно е опремено со нови компјутери, телевизори, нови табли и училиштен мебел, со што значително се подобрени условите за учење и за работа, а се осовремени и процесот на настава.
– Со реализацијата на овие проекти значително се обезбедија поквалитетен воспитно-образовен процес во училиштето и современи услови за настава, а поддршката на училиштата од страна на Општина Битола ќе продолжи и во наредниот период, со цел да се создадат подобри услови за учениците и за наставниот кадар – вели градоначалникот Тони Коњановски, потенцирајќи дека треба да се реализираат уште два големи инфраструктурни проекта – промена на внатрешните врати на училниците во двете училишни згради и промена на електричната инсталација во училиштето.
И во средното техничко училиште „Ѓорѓи Наумов“ во Битола се реализирани инвестиции за подобрување на условите за работа и подобрување на опременоста на училиштето. Главна инвестиција се проектирањето и изведбата на фотонапонска централа. Поконкретно, поставени се фотонапонски панели за производство на електрична енергија со инсталиран капацитет од 40kW на покривната површина од постојниот објект на училиштето, како и метеостаница.
– Со оваа инвестиција ќе се намалат трошоците и ќе се придонесе за зголемување на енергетската ефикасност и за заштита на животната средина. Покрај централата, обезбеден е и едукативен фотонапонски панел за реализација на наставата по стручни предмети, како и комплети ардуино (Solar tracking learning kits) за спроведување практични вежби од областа на енергетиката – велат од училиштето.
Дополнително, во соработка со локалната самоуправа и Министерството за образование во последните неколку месеци значително е подобрена опременоста на училиштето со информатичка и видеоопрема (компјутери, графички картички, камери, 3Д-печатач и сл.), како и со набавка на друга стручна опрема (фреквентен регулатор, термовизиска камера, тестер на соларни системи, повеќенаменски тестер на електрични инсталации, печатачи). Поставен е и ламинат во наставничката канцеларија.
– Обезбедената стручна опрема опфаќа и сензори, микроконтролери, шилдови и други електронски компоненти, како што се модули RFID, ултразвучни сензори, релејни модули и многу други елементи што ќе им овозможат на учениците да работат на современи проекти. Преку оваа поддршка, младите техничари ќе можат да стекнат драгоцено знаење и практични вештини, што ќе им помогне во нивниот понатамошен професионален развој. Како резултат на овие инвестиции во образованието на младите се и освоените први места на повеќе национални натпревари. Ваквата инвестиција е од непроценливо значење за иднината на стручното образование – вели директорката Жанета Сервини.
Според градоначалникот на Битола, Тони Коњановски, Општината и во следниот период ќе овозможи поддршка на идните планови и активности, насочена кон создавање подобри можности за училиштата.
