- Иако Русија не присуствуваше на разговорите во Женева, американскиот државен секретар Марко Рубио рече дека Русите „имаат глас и ќе бидат консултирани“
Постигнат е огромен напредок во разговорите за прекин на војната во Украина, изјави државниот секретар на САД, Марко Рубио, по завршувањето на разговорите со украинската делегација во Женева во неделата, додавајќи дека е „голем оптимист“ оти нешто може да се постигне. Рубио им рече на новинарите дека „нема да шпекулира ниту да навлегува во детали за ниту една од специфичните ставки во најновата верзија на предлогот“ за постигнување мир во Украина, бидејќи тие би можеле „понатамошно да се развијат или променат во наредните денови“, соопшти Стејт департментот.
– Искрено, до утре или задутре, тоа би можело дополнително да се развие и промени. Но можам да ви кажам дека сум голем оптимист дека можеме да направиме нешто тука, бидејќи денес постигнавме огромен напредок – рече Рубио.
Американскиот претседател Трамп е задоволен од извештаите
Кога беше прашан како американскиот претседател Доналд Трамп го оцени напредокот постигнат за време на преговорите во Женева, Рубио порача дека смета оти е „доста задоволен од извештаите“ што му биле дадени за постигнатиот напредок.
Иако Русија не присуствуваше на преговорите во Женева, Рубио рече дека Русите „имаат глас и ќе бидат консултирани за следните чекори кон постигнување мир“.
– Почнавме рано во овој процес со нашето разбирање за руската позиција што ни беше соопштена на повеќе начини – рече Рубио.
Тој додаде дека е „очигледно“ дека ако може да се постигне договор со украинската страна, тоа треба да ѝ биде соопштено на руската страна.
– Тоа е друг дел од равенката. Русите мора да се согласат со ова за да функционира – рече Рубио.
Рубио: Наша цел е да ја завршиме оваа војна што е можно поскоро
На прашањето каков е контрапредлогот на Европејците на мировниот предлог од 28 точки на САД за прекин на војната во Украина и дали ќе се придржуваат до рокот од 27 ноември за склучување на тој договор со украинската страна во преговорите, Рубио одговорил дека „крајниот рок е ова да се заврши што е можно поскоро“.
– Секако, би сакале да биде четврток. На крајот на краиштата, важно е тоа што постигнавме значителен напредок. Навистина се придвиживме напред. Затоа сум голем оптимист дека ќе го постигнеме ова во многу разумен временски рок, многу брзо. Без разлика дали е четврток, дали е петок, дали е среда, дали е понеделник следната недела, сакаме тоа да биде наскоро бидејќи од сега до времето кога ќе се реши тоа ќе умрат повеќе луѓе. Ќе има поголемо уништување.
Нашата цел е да ја завршиме оваа војна што е можно поскоро, но ни треба малку повеќе време – рекол Рубио.
Кога го прашале што мисли за европскиот контрапредлог на американскиот предлог за прекин на војната во Украина, Рубио рекол дека „не видел никаков контрапредлог“. Тој нагласи дека завчерашниот ден на преговори во Женева „бил најдобриот ден“ во сите „десет месеци работа на овие прашања“.
Рубио потврди дека на преговорите во Женева се сретнал и со европски претставници, односно со советниците за национална безбедност на различни земји што биле присутни во тој швајцарски град, на кои им бил презентиран напредокот што американската делегација го постигнала со претставниците на Украина. Рубио додаде дека прашањата во преговорите со Украина што се однесуваат директно на Европа или НАТО се оставени „како дел од посебен тек (на преговори), бидејќи тоа го вклучува и нивниот придонес“.
Кога беше прашан дали Соединетите Американски Држави се отворени за барањето во контрапредлогот на мировниот предлог на САД за Украина, со кој би се применил членот 5 од НАТО, кој бара од сите земји членки да одговорат доколку некоја од нив биде нападната, Рубио рече дека „нема да ги дискутира деталите за тоа на што се работи во однос на какви било специфични одредби“.
– Јасно е дека сите ние признаваме дека дел од конечното завршување на оваа војна ќе бара Украина да се чувствува безбедно и никогаш повеќе да не биде нападната. Значи, тоа е очигледно нешто што треба да се дискутира. Мислам дека постигнавме значителен напредок по тоа и по други прашања. Но, нема да навлегувам во детали – истакна Рубио.
Продолжува работата на голем број прашања од тековниот мировен предлог за Украина
Кога беше прашан дали ќе има телефонски разговор меѓу Трамп и украинскиот претседател Володимир Зеленски во наредните часови, Рубио рече дека тоа е „можно“. Тој исто така рече дека работата на мировниот предлог за завршување на војната во Украина продолжува, но не во Женева.
– Овој процес трае речиси три недели и навистина се забрза во последните 96 часа. Значи, ова е тековен процес. Не мора да бидеме тука во оваа зграда за да го започнеме. Но, сметавме дека тоа што сме тука лично денес ни овозможува да преземеме големи чекори, особено затоа што Украинците испратија делегација на толку високо ниво што има овластување да се врати во нивниот главен град, да разговара со нивниот претседател и да се договори за одредени работи – изјави Рубио.
Според шефот на американската дипломатија, како и со секој конечен договор, тој ќе мора да биде договорен од претседателите Трамп и Зеленски и „постојат голем број прашања“ на кои ќе продолжи да се работи.
– Во текот на последните 96 часа имаше обемна ангажираност со Украина. Целта денес беше да се земат точките од планот, кои беа 26 или 28, во зависност од верзијата, и да се обидеме да утврдиме кои од нив се отворени точки – посочи Рубио.
Тој рече дека предлогот на САД за завршување на војната во Украина е „работен документ“ и дека ниту едно од отворените прашања со Украина не е непремостливо.
– Можам да ви кажам дека точките што остануваат отворени не се непремостливи, само ни треба повеќе време отколку што имаме денес – рече Рубио.
На прашањето дали Украина посочила дека е подготвена да направи компромис за некои од клучните прашања предложени во мировниот план на САД, како што е откажувањето од својата територија во замена за мир со Русија, Рубио наведе дека „нема да навлегува во детали за темите што биле дискутирани, бидејќи ова е тековен процес“. Р.С.
И САД и Украина составија обновена верзија на мировната рамка
- Во заедничката изјава на САД и Украина се наведува дека конечните одлуки во рамките на овој план ќе ги донесат претседателите на Украина и САД, Володимир Зеленски и Доналд Трамп
Секој иден договор за прекин на војната во Украина мора целосно да го поддржува суверенитетот на Украина и да обезбеди одржлив и праведен мир, а Украина и САД составија ажурирана верзија на мировна рамка, објави Белата куќа. Во заедничката изјава на САД и Украина се наведува дека конечните одлуки во рамките на овој план ќе ги донесат претседателите на Украина и САД, Володимир Зеленски и Доналд Трамп.
Исто така се наведува дека завчерашните разговори за мировна рамка во Женева, Швајцарија, биле конструктивни, фокусирани и почитувани, со акцент на заедничка посветеност за постигнување мир.
– Двете страни се согласија дека консултациите беа многу продуктивни. Разговорите покажаа значителен напредок кон усогласување на позициите и идентификување на јасни следни чекори – се наведува во соопштението.
Таму се додава дека Украина и САД продолжуваат интензивно да соработуваат по ова прашање, вклучувајќи и тесна соработка со европските партнери.
– Украинската делегација ја потврди својата благодарност за непоколебливата посветеност на Соединетите Американски Држави и, лично, на претседателот Доналд Трамп за нивните неуморни напори насочени кон завршување на војната и губењето животи – се наведува во соопштението.
Делегациите од Украина, САД и европските земји завчера во Женева разговараа за американскиот план од 28 точки за завршување на војната во Украина, откако Киев и неговите сојузници изразија незадоволство од делови од предложениот план што предвидуваат големи отстапки за Русија.
Во меѓувреме се појави европски контрапредлог, подготвен од Велика Британија, Франција и Германија. Предлогот наводно го зема американскиот план како основа, но потоа го анализира точка по точка, со предложени измени.
Меѓу другото, големината на украинската армија е ограничена на 800.000 војници во време на мир. Дополнително, САД даваат гаранција што го отсликува членот 5на НАТО, според кој сите членки на Алијансата се должни да реагираат доколку некоја од нејзините членки биде нападната.
Членот 21, пак, ја обврзува Украина да не се обидува со сила да ја врати окупираната суверена територија и дека преговорите за територијална размена започнуваат на линијата на контакт. Р.С.
