За нас повеќе отколку за многу други во светот јазикот претставува, со сѐ што е на него создадено, како говорен и пишуван текст, најголемо приближување до идеалната татковина, тој е заправо единствената наша комплетна татковина. Затоа и во моменти на ломења, раслојувања и колебања, последно што треба да ни паѓа на ум е да ги поставуваме под прашање придобивките на нашата самостојна акција на јазичен план. Јазикот е нашата единствена неподелена татковина!
Странски амбасадори во земјава, силни промотори на македонскиот јазик
И иако оспоруван од официјална Софија, македонскиот јазик е факт, вистина и реалност за која во последно време на јавна сцена сѐ поголем број странски амбасадори во земјава искажуваат свесност и поддршка. Чувствувајќи дека прашањето за македонскиот јазик и македонскиот народ шизофрено се проблематизира од страна на една членка на ЕУ, а тоа недвосмислено имплицира дека таквиот начин ги деградира и урнисува целиот демократски свет и универзалните европски придобивки, ги урива темелите не само на ЕУ туку и на целата меѓународна заедница и меѓународното право на која таа се фундира, многу странски дипломати во земјава токму на еден дипломатски начин реагираат и искажуваат силен став. Имено, со употребата на македонскиот јазик на земјата-домаќин, тие испраќаат многу јасна порака до меѓународната јавност, а и до Софија, дека нашиот мајчин македонски јазик е реалност, дека се разликува од другите, дека е средство за разбирање меѓу различните народи и дека е нивна чест да го употребуваат како средство за комуникација и напредок во односите на меѓународен план. Дипломатите сѐ почесто во своите јавни настапи зборувајќи го македонскиот јазик демонстрираат дури и поголема афирмација од тоа што Македонија дипломатски и политички го прави за негова заштита. Тој гест на странските амбасадори станува силен сојузник во верификацијата на исправноста на политиките во нашата земја, кои имаат поткрепа во меѓународното право, а се однесуваат на јазикот, историјата, културата, идентитетот…
Американска амбасадорка Анџела Агелер и британскиот амбасадор Лосон со порака до граѓаните да ги негуваат јазикот и културата
Изминатиот период, во време кога се „бие битка“ за афирмација на македонскиот јазик, како клучен елемент за потврда на македонскиот национален идентитет, во политичките премрежиња што ѝ се наметнуваат на Македонија, се наметнува тоа што новата американска амбасадорка Анџела Агелер, која пред неколку дена ја презеде функцијата амбасадорка на САД во земјава, во обраќањето пред шефот на државата, Стево Пендаровски, зборуваше токму на македонски јазик.
Реферирајќи на својот поранешен ангажман во земјава, таа рече дека Македонија донела тешки одлуки за зачленување во НАТО и напредок кон ЕУ.
Таа добро го познава македонскиот јазик и го говори сосема коректно, па на некој начин ја продолжува практиката на американската дипломатија кон Македонија да испраќа амбасадори што не се ограничуваат да го говорат македонскиот јазик, покажувајќи нужна почит кон земјата што им понудила гостопримство.
И денес, кога Македонија се соочува со бугарските опструкции и нејасната европска иднина, САД повторно ги подигаат односите со земјава на уште повисоко ниво, а најдобра потврда е неодамнешниот почеток на Стратегискиот дијалог меѓу САД и Македонија. На агендата на овој дијалог меѓу двете земји се регионалната соработка, одбраната и безбедноста, енергетиката, економските теми, културната соработка, образованието, демократскиот развој, како и борбата против корупцијата и криминалот.
Според аналитичарите, токму ваквата континуирана американска поддршка за
Македонија ги одвраќа сите оние што не ѝ мислат добро на нашата земја, тврдат аналитичарите.
Тоа е одраз на почит, истовремено тоа е и најголемата поддршка што една странска земја може да ја даде во одбраната на македонскиот јазик од нападите од соседството.
Имено, никој нема да може да ѝ префрли на американската амбасадорка каков јазик говори, а уште помалку дека тој јазик, наводно, бил дијалект на некој друг јазик.
Македонските граѓани особено го паметат поранешниот амбасадор Филип Рикер, кој исто така говореше македонски, но често беше виден и на спортските терени како ги бодри македонските екипи, носејќи го македонскиот дрес.
Сѐ поголем број странски дипломати и амбасадори зборуваат на македонски јазик, за разлика од пред десетина години, кога ретко некој го владееше јазикот на земјата-домаќин.
На почетокот од 1990-тите години, од дипломатите што доаѓаа во земјава речиси ниеден странски амбасадор не го владееше македонскиот јазик. На почетокот од овој милениум пристигнуваа амбасадори со познавање на македонскиот јазик, кои го зборуваат и на јавни настапи.
Еден месец порано и Метју Лосон, британскиот амбасадор во земјава, положил испит за познавање на македонскиот јазик, ниво Ц1. Тој за ова објави на Твитер, каде што објавил и кратко видеообраќање во кое им порачува на граѓаните да ги негуваат јазикот и културата.
– Одличен почеток на неделата со сертификат за положен испит по македонски јазик. Ми претставува чест и задоволство што го учам овој прекрасен јазик – напиша амбасадорот на Твитер.
САД во земјава и во обраќањето пред шефот на државата, Стево Пендаровски, зборуваше на македонски јазик
Јазикот е нашата единствена неподелена татковина!
Но како да се зголемат интересот и општествената грижа за македонскиот јазик на многу повисоко ниво? Или, како што своевремено порача големиот македонски великан Блаже Конески, јазикот е нашата единствена неподелена татковина.
Како да го исполниме неговиот завет?
Големиот македонски поет, академик Блаже Конески, како еден од кодификаторите на современиот македонски литературен јазик, филолог и лингвист, литературен историчар, преведувач и професор, вонсериски лингвист, меѓународно реномиран славист, автор на фундаментални дела од областа на македонскиот јазик и македонската литература многупати посочувал дека многумина сѐ уште посакуваат „македонскиот народ да биде само објект, а не и историски субјект“.
Пишувајќи за таквите обиди, Конески продолжува: „Послушајте Македонци! Бидете на штрек пред таквите ’правни’ диверзии, од каде и да идат…!“
– За нас повеќе отколку за многу други во светот, јазикот претставува, со сѐ што е на него создадено, како говорен и пишуван текст, најголемо приближување до идеалната татковина, тој е заправо единствената наша комплетна татковина. И оние наши места што се испустени живеат во нашата традиција со песните, приказните, гатанките и поговорките, запишани некогаш во нив, и оние наши места што се испустени ги опишува, опева и слави современата литература на македонски јазик. Затоа и во моменти на ломења, раслојувања и колебања, последно што треба да ни паѓа на ум е да ги поставуваме под прашање придобивките на нашата самостојна акција на јазичен план. Јазикот е нашата единствена неподелена татковина – посочувал Конески.
Признание за почит
Универзитетскиот професор Живко Андревски вели дека своевремено кога Бил Клинтон станал претседател на САД му испратиле брошура „Клинтон 42-от претседател на САД“.
– Брошурата беше напишана на беспрекорен македонски јазик. Се јавив до американската амбасада да прашам кој го превел овој текст оти ретко се среќавам со толку писмени текстови, но ми беше одговорено дека преводот е направен во САД. Замислете, тие таму имаат човек, можеби е и Македонец, што толку добро го познава македонскиот јазик, едноставно перфектно го превел текстот на македонски. Значи Американците покажале почит за нашиот јазик, за тоа мора да им се оддаде признание – вели професор Андревски.
