Во рамките на борбата против корупцијата, француските парламентарци се должни да ги пријавуваат подароците и поканите добиени во текот на целата година, сепак сите парламентарци немаат исти подароци. Избраните функционери мора да ги пријават примените донации кога нивната вредност надминува 150 евра, за да се избегне каков било конфликт на интереси. Мора да се пријават и патувања финансирани од трети страни. Меѓутоа, правилото важи само за подароци што можат да создадат конфликт на интереси, а не за сите примени подароци. Деновиве, истражувачки медиуми имаа можност да фрлат поглед кон официјалните декларации на подароците што ги добија француските парламентарци
Еден интересен поглед кон списокот на пријавените подароци што годинава ги добиле пратениците од француското собрание
За пратениците од 17-от законодавен дом Дедо Мраз дојде малку рано. Избрани во јули минатата година, тие мора да покажат транспарентност, со редовно пријавување на подароците добиени во текот на годината, како и нивните претходници. И, како што забележаа нашите колеги од „Политико“ во написот објавен неделава, Олимписките и Параолимписките игри во Париз годинава беа повод за голем број донации за парламентарците.
Во Франција, за потсетување, подароците за пратениците се регулирани со закон, а примателите се предмет на обврска за транспарентност. Избраните функционери мора да ги пријават примените донации кога нивната вредност надминува 150 евра, за да се избегне каков било конфликт на интереси. Мора да се пријават и патувања финансирани од трети страни. Меѓутоа, правилото важи само за подароци што можат да создадат конфликт на интереси, а не за сите примени подароци. Што особено објаснува зошто декларациите на пратениците заземаат само неколку страници, како што истакнува „Политико“. Тие можат да прифатат сè, освен ако тоа не може да ја загрози нивната примерна природа. Сенаторите мора да ги одбијат оние што доаѓаат од лобистите кога ќе ја надминат оваа сума.
Кога ќе навлеземе во изјавите на пратениците, списокот на подароци е многу разновиден – понекогаш уредно се забележуваат книги, донирани шишиња со вода. Што се однесува до сенаторите, декларациите од 2018 година се содржани во документ од шест страници.
– Многу е изненадувачки – коментира парламентарниот соработник, кој би очекувал потемелен преглед.
Што се однесува до подароците што им се даваат на европратениците, нивната презентација ги задоволува најљубопитните: секој предмет мора да биде фотографиран – како свилената марама дадена на Натали Лоазо (Рнесанса). Тие исто така мора да ги пријават сите патувања што не ги покриваат.
Поканите за Летните олимписки игри во прв план
Достапен за сите, списокот на подароци што ги добиваат пратениците затоа не е исцрпен, но содржи изненадувања. Олимписките игри во Париз (ЛОИ) беа особено поволни за понудите на парламентарците, со тринаесет подароци декларирани во август и десет во септември, во споредба со три во просек во остатокот од годината. Француските избраници, сепак, наидоа на повеќе или помалку еднаков третман. Пратеникот од От-де-Сен, Филип Жувин (ЛР), член на Комисијата за финансии, регионален советник и градски советник, на пример, доби тринаесет места за седум настани на ЛОИ, од Метрополата на Гранд Париз. Други, како Анајг Ле Меур, Ањес Фирмин Ле Бодо или Жан-Франсоа Русет, исто така, добија места. Стефан Мазар, исто така, беше поканет од „Франс телевизион“ да присуствува на атлетските настани во знак на благодарност за неговата „вклученост во подготовката на JOP Париз 2024 во рамките на 16-от законодавен дом, особено во рамките на Комитетот за културни прашања и образование“.
Чипс, концерти и книги
Помеѓу другите разгалени парламентарци, пратеничката за третата изборна единица на Лоара-Атлантик, Сеголен Амиот, доби маица на ЛОИ и Радио Франс, како и две книги по повод Игрите: „Спорт, историја на жени?“, од Камил Андрие и „Спортот и политиката, важно е да се учествува“, објавени од Политичката и Парламентарната ревија. Од своја страна, Силва Мајар и Анаиг Ле Мер можеа да присуствуваат на последниот концерт на Милен Фаремер на „Стад де Франс“, додека Констанс Ле Грип беше поканета од „Франс телевизион“ на концертот на Пол Мекартни во арената „Ла Дефанс“. Не се изоставени ниту љубителите на спортот, бидејќи бунтовниот Карлос Мартенс Билонго доби билети за фудбалскиот натпревар помеѓу Монако и Анже во ВИП-ложа, а неговата колешка Франсоаз Буфе можеше да присуствува на фудбалски натпревар на „Паркот на принцовите“, поканета од ПСЖ.
Поизненадувачки, но помалку егзотично, во октомври, пратеникот за Ил-ет-Вилен, Тристан Лахаис, доби седум пакети чипс проценети на 15 евра од компанијата „Бретс“. Ревносно, избраниот функционер во својата декларација за етика наведува дека сака да ги чува „за долгите вечери за разгледувањето на буџетот“, без да ги допре, велејќи „затоа можете да ги вратите ако е потребно“. Конечно, бунтовниот потпретседател на Националното собрание, Клеменс Гете, доби две патни торби од групата АДП, како и… две шишиња за вода, од Унијата на вода Ил-де-Франс.
Весла за сенатори
Пратениците не се единствените што пријавуваат одредени подароци заради транспарентност. Слична процедура постои и за нивните колеги во Горниот дом – Сенатот. Да не беа во непарен број, членовите на сенаторската мисија во Полинезија, на пример, речиси ќе можеа да веслаат дома минатиот април. Пет сенатори добија традиционално полинезиско весло од претседателот на Унијата за промоција на комуни на Француска Полинезија, како дел од информативната мисија за институционалната и административната состојба и правдата во Француска Полинезија. Овој кралски спорт на Тахити и другите полинезиски острови е традиционален во локалната култура. Качени во кану со потпора инспирирана од традиционалното кану, веслачите тргнуваат сами, во групи од по три, шест или дванаесет во трки од 500 метри до 150 километри за долгите настани.
Кога беше во Сенатот, министерката за односи со парламентот во оставка, Натали Делатр, можеше да ужива во настапот во операта „Бастилја“ под грижа на земјоделско-прехранбената група Аврил, чиј шеф на ФНСЕА, Арно Русо, е еден од лидерите.
Неколку дена по ручекот со менаџерот на кината на УГЦ, тимовите на сенаторот Еколог Јаник Жадот го дочекаа среќното изненадување да добијат едногодишна неограничена картичка, валидна за две лица. Поранешниот претседателски кандидат ги зеде, но нема да ги искористи, ветува неговиот тим. Неговиот колега Жан-Рејмонд Хугоне (ЛР) изјави дека го добил истиот подарок.
Вино, шампањ и чоколади
Унгарското вино е ценето од познавачите, особено неговата слатка страна, која потсетува на алзашките сорти грозје. Марин Ле Пен ќе може да дегустира шест шишиња благодарение на премиерот Виктор Орбан, кој ѝ понудил подарок од 240 евра.
Дванаесет шишиња шампањ „редерер“ му беа понудени од Ага Кан, духовен водач на Исмаили муслиманите, на Ерик Воерт. Износот на подарокот е 600 евра.
Центристичкиот сенатор Оливие Кадик, кој имаше корист од великодушноста на Катар за време на Светското фудбалско првенство во 2022 година, доби и гурманска кутија „Ла Мезон ду Шоколат“ – проценета на повеќе од 300 евра.
Нетранспарентност во провинциите
Надвор од Собранието се добиваат и други изненадувања. Градот Париз наскоро треба да ги објави годишните декларации на избраните функционери во главниот град, по барање на „Политико“ – и по упатување до управниот суд. Размислувањето за ова беше преземено на крајот на октомври, но декларациите сè уште не се откриени.
Во другите локални власти, ситуацијата е многу различна: некои немаат прецизни правила за тоа што избраните функционери можат да прифатат или не, а многу малку мора да се изјаснат што добиваат. Во регионот Нувел-Аквитанија ни е кажано дека ниту еден избран функционер не пријавил подарок или покана… што сугерира дека тие не добиле ништо.
Другите избрани функционери, како што се градоначалниците, не подлежат на никакви посебни правила за подароци, но секако остануваат обврзани да го почитуваат законот против корупција и може да бидат санкционирани доколку се докаже дека подарокот резултира со услуга за возврат или ако проценетите количества се преголеми. Како и во случајот со Џак Ланг, на пример, кој доби костиуми во вредност што тогаш се проценуваше на 500.000 евра помеѓу 2013 и 2018 година. Сепак, беше оправдано дека овие подароци не се поврзани со никакво директно внимание, туку со „елеганцијата позната во целиот свет“ на поранешниот министер за култура, како што прецизира луксузниот бренд „Смалто“. Особено што Џак Ланг повеќе не беше на функцијата во тоа време, туку веќе се приклучи на Институтот за арапскиот свет.
Тони Гламчевски, дописник на „Нова Македонија“ од Стразбур
