Велес
Централното градско подрачје на Велес доби повеќе нови инфраструктурни содржини во рамките на проектот „Паметни решенија – Велес продолжуваме“. Проектот се базираше на Општинскиот план за мобилна одржливост и Стратегијата за развој на паметен град. Вкупниот буџет на проектот беше 751.470 евра, од нив 638.778 од ЕУ и 112.720 евра од Министерството за локална самоуправа.
Со проектот, централното градско подрачје доби одводна подземна мрежа за атмосферската вода, доби нов кружен тек кај Сарамале, преуредување на постоен кружен тек кај Споменикот на коњаникот, пешачка зона, велосипедска патека и проширување на тротоарите на улицата 8 Септември помеѓу двата кружни тека. Со првичното решение, преку овој проект, требаше централното градско подрачје да добие пешачка зона, но тоа се напушти.
Со овој проект се набавија и се поставија четири паметни клупи, кои имаат сопствена вифи-мрежа и полначи за мобилни, четири автобуски постојки со електронски дисплеи и дисплеи за тековни содржини или можност за рекламирање, два подземни контејнера и четири полначи за автомобили на струја, кои треба дополнително да се постават откако ќе се реши електронапојувањето. Набавени се и 10 електрични велосипеди, за чие користење подоцна ќе се решава, оти локалната власт нема правна основа за да ги изнајмува за користење.
