Клучниот морски теснец за светскиот транспорт на нафта во фокусот на воениот конфликт на Блискиот Исток
- Најновите напади врз бродови поврзани со САД и Европа во Ормускиот Теснец имаат тенденција на ескалација, а не деескалација на конфликтот меѓу Иран и американско-израелските сили, како што сакаат да претстават завојуваните страни. Од ден на ден се зголемува бројот на погодени бродови во Ормускиот Теснец, а од почетокот на борбите тој број изнесува околу 16. Продолжувањето на конфликтот го загрозува бродскиот сообраќај низ Ормускиот Теснец, кој е витален за светскиот сообраќај, што се одразува и врз цените на нафтата
Бродскиот транспорт во Персискиот Залив и низ виталниот Ормуски Теснец, преку кој се пренесува околу една петтина од светската нафта, е речиси запрен, откако САД и Израел започнаа напади врз Иран на 28 февруари, предизвикувајќи секојдневни бранувања на глобалните цени на нафтата до максимуми незабележани од 2022 година. Се известува дека, наводно, ирански бродови полни со експлозиви нападнале два танкера за гориво во ирачките води во средата, откако проектили погодиле четири брода во водите на Персискиот Залив, соопштија пристанишни и поморски безбедносни компании. Бродовите што беа цел на нападите во средата доцна навечер пловеа под знамињата на Маршалските Острови и на Малта и товареле гориво во Ирак. Најновите напади врз бродови поврзани со САД и Европа во Ормускиот Теснец означуваат ескалација на конфликтот меѓу Иран и американско-израелските сили, зголемувајќи го бројот на погодени бродови во регионот од почетокот на борбите на најмалку 16.
Закани од Иранската револуционерна гарда, Трамп ги отфрла ризиците
Иранската револуционерна гарда постојано предупредува дека секој брод што поминува низ Ормускиот Теснец ќе биде цел и соопшти дека тие нема да дозволат да се испорачува ниту „еден литар нафта“ од Блискиот Исток до САД, Израел или нивните партнери доколку продолжат нападите врз Иран. Американскиот претседател Доналд Трамп предупреди дека Вашингтон ќе го удри Иран посилно ако го блокира извозот на нафта и рече дека нафтените компании треба да го користат теснецот бидејќи „речиси целата иранска морнарица е исчезната“. Американската морнарица ги одбива речиси секојдневните барања од бродоградителската индустрија за воена придружба низ Ормускиот Теснец од почетокот на војната против Иран, велејќи дека ризикот од напади е превисок засега, изјавија извори запознаени со ова прашање за „Ројтерс“, и покрај тоа што претседателот Трамп рече дека САД се подготвени да обезбедат поморска придружба секогаш кога е потребно. Американскиот лидер исто така ги охрабри бродовите да продолжат да транзитираат низ Ормускиот Теснец
– Мислам дека треба да го прават тоа. Мислам дека ќе видите одлична безбедност, а тоа ќе биде многу, многу брзо – рече Трамп.
Блокадата на Ормускиот Теснец ќе ја соочи Европа со голема енергетска криза
Светските лидери, вклучувајќи ги и членовите на Групата седум (Г7) и Европската Унија, размислуваат какви мерки да преземат како одговор на влијанието на војната врз глобалните економии. Кристијан Бугер, професор по меѓународни односи на Универзитетот во Копенхаген и експерт за поморска безбедност, рече дека Европа ќе се соочи со „голема криза во снабдувањето со енергија“ ако Ормускиот Теснец не се отвори повторно.
– За бродската индустрија во моментов е невозможно да се помине низ Ормускиот Теснец. И ако во блиска иднина нема посилни сигнали дека барем можат да се обидат да поминат низ теснецот, тогаш се соочуваме со голема бродска криза, која може да трае со недели, ако не и со месеци – изјави Бугер за „Ал џезира“
САД и сојузниците сакаат да го запрат растечкиот тренд на цените на нафтата
Соединетите Американски Држави и нивните сојузници објавија чекори за ублажување на растечките цени на нафтата во средата, додека војната со Иран продолжува да создава хаос на глобалниот пазар на нафта поради тековните ракетни напади низ целиот Блиски Исток. Триесет и двете членки на Меѓународната агенција за енергетика (ИЕА) едногласно се согласија да ослободат околу 400 милиони барели сурова нафта за итни случаи, една третина од вкупните владини резерви на глобалниот енергетски надзорник и повеќе од двојно од претходното најголемо ослободување, соопшти агенцијата. САД подоцна соопштија дека ќе ослободат 172 милиони барели нафта од своите стратешки резерви на нафта во обид да ги намалат растечките цени на нафтата.
– Ова е голема акција за ублажување на непосредните влијанија од нарушувањата на пазарите. Но, да бидеме јасни, најважното нешто за враќање на стабилниот проток на нафта и гас е продолжувањето на транзитот низ Ормускиот Теснец – изјави извршниот директор на ИЕА, Фатих Бирол, за време на обраќањето од седиштето на агенцијата во Париз.
Цените на нафтата вчера се зголемија за повеќе од девет отсто и повторно се искачија над 100 долари за барел откако новите ирански напади врз резервите и инфраструктурата на Блискиот Исток го засенија рекордното ослободување на резервите од страна на Меѓународната агенција за енергетика (ИЕА). Суровата нафта брент (меѓународниот репер за цените) скокна за 9,3 отсто, на 100,5 долари.
Нафтените пристаништа во Ирак целосно престанаа со работа по нападите, додека комерцијалните пристаништа продолжуваат да функционираат, соопшти ирачката државна новинска агенција, повикувајќи се на раководителот на државната Генерална компанија за пристаништа на Ирак (ГЦПИ). Р.С.
