Претседателот на Словенија Борут Пахор ги повтори заложбите за отпочнување на преговорите со Европската Унија. Ова беше истакнато на средбата со македонскиот претседател Стево Пендаровски денеска во Нови Сад, во рамките на четвртиот Регионален младински форум.
На средбата беше оценето дека двете земји имаат одлични односи кои се карактеризираат со пријателство и меѓусебно разбирање, а беа разменети и мислења за можностите за понатамошно унапредување и збогатување на соработката во повеќе области од взаемен интерес.
-За Северна Македонија не постои друга алтернатива, освен европската интеграција – посочи претседателот Пендаровски.
Тој се заблагодари за отворената и конструктивна поддршка од Словенија за аспирациите на нашата земја за членство во ЕУ и НАТО којашто беше потврдена со ратификацијата на Протоколот за членство на Македонија во НАТО, како и постојаната поддршка во рамките на Европската Унија.
Во таа насока, претседателот Пендаровски додаде дека интеграцијата на Македонија, како и на другите земји од Западен Балкан, во европските структури ќе биде огромен придонес кон трајна стабилизација на регионот, како и просперитетот на нашите општества.
