Предизборен митинг во Кичево вечерва оддржа претседателскиот кандидат на СДСМ, Стево Пендаровски. Тој во самиот вовед од своето обраќање пред многубројните присутни истакна, дека Кичево отсекогаш бил градот на етничка и верска толеранција каде сите граѓани живееле во слога и разбирање. Таков го знаел пред две децении, а истите вредности Кичево ги поседува и денес.
Пендаровски ги истакна ангажманот и промените кои ги донесе оваа Влада и во овој период, донесе тешки одлуки и компромиси, кои досега никој не ги направил во поновата историја. Донесе тешки одлуки кои ги отворија портите кон Европа, а направи и неколку законски проекти внатре, со кои придонесе за уште поголема сплотеност на граѓаните.
-Со двата договори со нашите соседи од противници создадовме пријатели и во овој момент ниту една држава во ЕУ или НАТО не може да ни стави приговор и да рече дека Македонија не ја работи работата како што треба. Откако дома ги средивме работите и ги средивме односите со нашите соседи, ланската година добивме покана за влез во НАТО и за првпат во нашата историја дефинитивно имаме гаранција за нашите граници и ќе седнеме на маса со 29 земји, кои се најмоќни во светот. Сега за Македонија не се решава надвор, туку ние сами одлучуваме, па дури и нас не прашуваат за одлуки во светот. И наскоро очекуваме да добиеме и датум за преговори за членство во Европската унија – подвлече Пендаровски. З.А.
