Седмите локални избори на кои се бираат градоначалници и советници во 80 општини и во Градот Скопје, денеска се одржуваат во Македонија, со што гласачките места беа отворени во 7 часот утринава.
Граѓаните можат да го дадат својот глас на 3.480 избирачки места за вкупно 10.831 кандидати (од кои 299 за градоначалници), на 91 листа поднесена од независни кандидати и 31 листа од политички партии и коалиции.
Право на глас имаат 1.824.864 граѓани. Од вкупниот број гласачи, во изводите на Избирачкиот список се запишани 1.740.147.
Гласањето ќе трае до 19 часот. Вчера гласаа болните, немоќните, лица со ковид-19, затвореници, лица во притвор, во старските домови и внатрешно раселените лица.
Локалните избори ќе се спроведат со почитување на општите мерки за заштита од ковид-19.
