Координаторот на пратеничката група на ВМРО-ДПМНЕ, Никола Мицевски на прес-конференција го обвини владеачкото мнозинство дека работи на штета на граѓаните и економијата во време на пандемија. Тој рече дека 5. пакет мерки трпи заради тврдоглавоста на власта.
– 5. пакет на мерки ќе беше изгласан уште во четвртокот доколку не беше инаетот на власта, а сега компаниите ќе ги имаа парите. Џафери и Заев намерно ги кочеа мерките – изјави Мицевски.
Тој нагласи дека пратениците на ВМРО-ДПМНЕ денеска се во Собранието и дека ќе обезбедат кворум за 36. седница за гласање на 5. пакет на мерки, за помош кон стопанството.
– Стопанствениците два месеци чекаат помош од власта, која работи на нивна штета. Петтиот пакет на мерки помина на влада на 16 февруари, во собрание беше на 19 февруари. Од тогаш до денес поминаа 2 месеци. Заев имаше кворум кога сам си бараше доверба за владата и можеше да ги изгласа мерките, тој тоа не го направи. Не го направи затоа што тој е кочничар, и сака да создава атмосфера дека некој друг кочи. Го повикуваме Талат Џафери денес да ја отпочне 36 седница, за таа веднаш да биде изгласана и парите да стигнат кај граѓаните – додаде тој.
Од ВМРО-ДПМНЕ дополнително го повикуваат Џафери, да организира таканаречени КОВИД седници на кои ќе бидат само на дневен ред точките и законските решенија потребни за справување со пандемијата.
– Врзување на нужноста за справување со пандемијата со закони кои само Заев знае зошто ги турка е безобразие и мора да престане. Пратеничката група на ВМРО-ДПМНЕ нема да дозволи да биде злоупотребена и да обезбедува кворум за закони кои што не се во интерес на граѓаните туку единствено би служеле на криминалните афери на СДСМ и ДУИ и токму затоа кажавме неколку пати дека поддршка ќе дадеме само на законите поврзани со јавното здравје – порача Мицевски.
