Собраниската Комисија за уставни прашања на денешната седница го разгледа Предлог-уставниот закон за спроведување на амандманите од 33 до 36 на Уставот на Република Македонија и заклучи да го проследи на натамошна постапка.
Во текот на денешната расправа Комисијата усвои три од предложените седум амандмани на Предлог законот. Едногласно со десет гласа „за“ беше усвоен амандманот предложен од независните пратеници од ВМРО-ДПМНЕ, со кој се прецизира дека уставните амандмани од 33 до 36 на Уставот не произведуваат правно дејство, не влегуваат во сила и се неважечки доколку Грција веднаш не ја исполни својата обврска да го прифати Договорот од Преспа и да го ратификува протоколот за членство на Македонија во НАТО. Амандманот во целост го прифати и владиниот претставник, заменик министерот за надворешни работи Андреј Жерновски, а Соња Мираковска од НСДП рече дека со него појасно, поцврсто и поразбирливо за граѓаните се гарантира примената на Преспанскиот договор.
Со преформулација од Комисијата едногласно беше прифатен и аманманот, првично поднесен од претениците Зијадин Села и Сурија Рашити од Алијансата на Албанците, со кој се истакнува дека државната граница на Република Македонија е нашата постојна граница со Албанија, Бугарија, Грција, Србија и Косово со која, како што рече Жерновски, се прифаќа реалноста дека Македонија има нов сосед Република Косово.
Со преформулација од Комисијата со осум гласа „за“ и два „против“ беше прифатен и амандманот со кој во член 2 став 2 од Уставниот закон точката на крајот се заменува со запирка и се додаваат зборовите што не ја определува ниту ја предодредува етничката припадност на граѓаните. Со тоа, како што беше речено, се става јасна дистинкција меѓу државјанството и етничката припадност на граѓаните на Република Македонија. За овој амандман беа поднесени два слични предлози, првиот предложен од претеникот Мухамед Зекири од СДСМ, а вториот од независните пратеници од ВМРО-ДПМНЕ кои беа повлечени по усогласувањето натекстот на амандманот од Комисијата.
Најголема полемика се водеше за двата амандмана поднесени од пратениците на Беса и Алијанса на Албанците со кои се бараше во документите во графата државјанство да пишува граѓани на Република Северна Македонија, наместо како што е предвидено во Уставниот закон – македонско/граѓани на Република Северна Македонија. За Фадил Зендели од Беса на тој начин се внесува етнички наместо државен концепт. Тој посочи дека суверенитетот на државата потекнува од граѓаните и државјанството им припаѓа на граѓаните. Со предложеното како што рече само се создаваат нови јазови и проблеми меѓу граѓаните. Во реплика заменик министерот Жерновски му посочи дека неговата логика е исправна и оти откако ќе влезат уставните измени во сила во членот 4 ќе пишува граѓанин на Република Северна Македонија, но додаде дека Владата не е во можност да го прифати неговиот амандман зашто со тоа ќе направи упад во Договорот од Преспа.
Пратеничката Нола Исмајловска Старова од независната група на ВМРО-ДПМНЕ му порача на Зендели дека е „тажно Грција да нема проблем со оваа формулација, а нашите сограѓани да имаат“, а Самка Ибраимовски од ПЦЕР додаде дека и сега во патните исправи и личните карти во графата државјанство стои „македонско“, а со уставните измени, рече, ќе се додаде /граѓанин на Република Северна Македонија, што се поклопува со барањата на Беса.
