Претседателот на Република Македонија Ѓорге Иванов на 27 април во Скопје ќе биде домаќин на состанокот на лидерите на земјите-учеснички од Процесот Брдо-Бриони. На состанокот ќе присуствуваат претседателите од земјите во регионот, како и претседателот на Европскиот совет Доналд Туск.
Главната цел на Процесот Брдо-Бриони е целосна интеграција на земјите од регионот во Европската Унија, стабилизирање на состојбите во Западен Балкан преку јакнење на регионалната соработка и решавање на отворените прашања.
Како што соопшти Кабинетот на претседателот Иванов, на состанокот на лидерите на земјите-учесници на Процесот Брдо-Бриони, на 27 април во Скопје, се очекува присуство на претседателите на Албанија, Илир Мета, претседавачот со Претседателството на БиХ Бакир Изетбеговиќ, претседателот на Косово Хашим Тачи, претседателот на Словенија Борут Пахор, претседателот на Србија Александар Вучиќ, претседателката на Хрватска Колинда Грабар-Китаровиќ и претседателот на Црна Гора Филип Вујановиќ.
Согласно досегашната практика, покрај лидерите на земјите-учеснички, на состаноците на Процесот Брдо-Бриони учествуваат високи гости од Европската унија, како и лидери на земји-членки на ЕУ. Еден од почесните гости на состанокот во Скопје е претседателот на Европскиот совет, Доналд Туск.
Во фокусот на годинешниот состанок на лидерите на земјите-учеснички од Процесот Брдо-Бриони во Скопје е потребата за подобрување на меѓусебната поврзаност во политичка, економска, инфраструктурна и безбедносна смисла, а во контекст на новата стратегија на Европската Унија за Западен Балкан.
Во рамки на Процесот Брдо-Бриони, за прв пат на иницијатива на Република Македонија ќе се одржи состанок на директорите на Агенциите за разузнавање на земјите учеснички во Процесот, на кој ќе се дискутира за безбедносната поврзаност, како сегмент на регионалната соработка, соопшти Кабинетот на македонскиот претседател.
Процесот Брдо-Бриони прв пат се одржа во 2013 година на заедничка иницијатива на претседателите на Република Словенија и Република Хрватска, во Брдо кај Крањ.
Земји-учеснички во Процесот Брдо-Бриони се Република Албанија, Босна и Херцеговина, Република Косово, Република Македонија, Република Словенија, Република Србија, Република Хрватска и Црна Гора, претставени на ниво на претседатели на држави.
Лидерите на земјите од Процесот Брдо-Бриони се состануваат најмалку еднаш годишно.
Во рамки на оваа регионална иницијатива досега се одржани шест состаноци, од кои пет редовни и еден вонреден: во Брдо кај Крањ, Република Словенија во 2013 година, во Дубровник, Република Хрватска во 2014 година, во Будва, Црна Гора во 2015 година, вонреден самит во Загреб, Република Хрватска во 2015 година, во Сараево, Босна и Херцеговина во 2016 година и во Брдо кај Крањ, Република Словенија во 2017 година, а на кои редовно учествува Претседателот Иванов.
