За лидерот на ДУИ, Али Ахмети, важно е да се има консензус од сите политички партии за одредување на датумот за претстојните избори, а пак, лидерот на Беса, Билал Касами, по средбата кажа дека нивниот предлог е избори во јуни.
Ахемти посочи дека здравјето на граѓаните е пред се, но и дека ДУИ е свесна дека државата е без Собрание. Запрашан дали сега ја сфаќаат сериозноста на ситуацијата, но и оправдувањето на одлуката на Талат Џафери да не го свика Собранието, Ахмети го поддржа својот сопартиец.
– Важно е да се има консензус за овие прашања, но здравјето на граѓаните е пред се. Изборите се пред се, но треба да се има консензус за тој датум и да се имаат во превид мерките од здравствените институции. Претседателот на Собранието го почитува Уставот и е во комуникација со правните експерти. Ова беше важна средба, се разгледаа документи од институциите кои се одговори за ситуацијата. Имаше дебата од сите политички партии, бидејќи изразивме став дека сите сме загрижени за ситуацијата и тоа треба внимателно да се следи. Здравјето на граѓаните, за нас е пред се. За ситуацијата, треба да бидеме во целосна комуникација со здравствените институции, за да имаме консензус за датумот на изборите. Ние сме свесни дека земјата е без Собрание, дека земјата е со техничка влада, но оваа ситуација е предизвикана од пандемијата и еден многу опасен вирус. Многу е важно оваа ситуација да не се политизира или партизира за политички цели – рече Ахмети.
Претседателот на Беса, Билал Касами, повтори дека немало усогласување на датумот за изборите на лидерската средба. Тој кажа дека институциите треба да ја тргнат забраната за движење, но и психички да ги спремаат граѓаните за избори. Касами посочи дека предлогот на Беса е избори во јуни.
– Ситуацијата со коронавирусот, според здравствени експерти, ќе продолжи и понатаму до откривањето на вакцината и ние треба да се усогласиме за еден датум за избори, кој што со завршувањето на вонредната состојба, треба да се одржат. Нашиот предлог како Беса е изборите да бидат во рамките на Уставот и законот, за понатаму, Владата која ќе произлезе од овие избори, подобро да се соочи со здравствената и економската ситуација. Ние со политичка одлука ги одложивме изборите, сега, течат претходните рокови бидејќи не се усогласивме за нови избори, па останува Владата и претседателот да одлучат до кога ќе продолжи вонредната состојба, а по нејзиното завршување, да се определи и датумот на изборите. Апелираме институциите да ги подготват граѓаните за претстојните избори, нашиот предлог како Беса беше јуни, а за тоа ќе се одлучи како ќе биде прекината вонредната состојба. Институциите треба полека да ја тргнат забраната за движење од 7 попладне до 5 наутро, да се почитува социјалната дистанца, граѓаните психички да се спремаат за избори – рече Касами.
