Македонија има напредок на патот кон ЕУ, атмосферата во државата е сменета во позитивна насока и земјата добро е подготвена за почеток на преговори, но сѐ уште не е подготвена за членство во Унијата. Пофалби за Преспанскиот договор, но и предупредувања од можен неуспех од неговата ратификација.
Ова било во фокусот на дебатата за Македонија насловена „Македонија меѓу надеж и загриженост“ во германскиот Бундестаг, организирана од Друштвото за Југоисточна Европа, на која учествуваа одговорните за Македонија во Министерството за надворешни работи Кристијан Хелбах и во кабинетот на канцеларката Меркел, Матијас Лутенберг, авторот на патоказот за реформите во Македонија, Рајнхард Прибе, повеќе пратеници во Бундестагот, дипломати, како и гостите од Македонија и Грција, Симонида Кацарска и Ксенија Куналаки од грчкиот весник „Катимерини“, пишува „Дојче веле“.
Лутенберг ја поздравил храброста на премиерот Заев да ги решава проблемите со соседите Бугарија и Грција уште од почетокот на мандатот и тоа, според него, „бил важен сигнал да му се каже и на сопствениот народ дека се подготвени да решаваат проблеми“.
Посочил дека Германија била многу ангажирана за надминување на спорот со Грција, споменувајќи ја посетата на Меркел на Скопје пред референдумот, а „сега е подготвена и конкретно да помогне со советување и финансиска поддршка“.
– Сакаме да ја поддржиме иднината. Ќе испратиме советници за македонската Влада. Сакаме земјата не само да биде стабилна, туку и да напредува – вели Лутенберг, додавајќи дека таква поддршка очекува и од ЕУ, со цел Македонија економски да закрепне, но и да стане поинтересна за странски инвестиции, за што, прв предуслов е „владеењето на правото“.
Прибе посочил дека ако евентуално во Грција не биде ратификуван Преспанскиот договор, ЕУ мора да ги отвори преговорите за членство со Македонија, независно од спорот за името, а Скопје треба да биде мотивирано за да ги продолжи реформите.
Хелбах, пак, оценил дека доколку не помине договорот од Преспа, тоа би било лоша вест за земјата, и дека кај дел од населението во Македонија, лојалноста кон државата зависи од напредокот на земјата на евроатлантскиот пат.
– Се плашам дека националистичките или етничките наративи повторно ќе нараснат. Доколку Македонија не успее да напредува тоа ќе има последици за стабилноста – предупреди германскиот дипломат.
Во врска со бегството на Никола Груевски и добивањето азил во Унгарија, Хелбах оцени дека случајот може да му ја олесни позицијата на актуелниот лидер на ВМРО-ДПМНЕ Христијан Мицкоски.
– Има сигнали од Мицкоски дека сака да го поддржи договорот од Преспа – вели Хелбах.
Поранешната германска амбасадорка во Македонија Гудрун Штајнакер, пак, критикуваше дека реформите во Македонија не се мрднати и дека остануваат проблемите со владеењето на правото. Како виновник за ваквата состојба Штајнакер ја посочи ДУИ која, според неа, продолжува со корупциските практики од минатото, пренесува „Дојче веле“.
