Вестите од Бугарија не се охрабрувачки и очигледно дека е потребно формирање на политичка влада за надминување на разликите и деблокада на евроитеграциите, изјави денеска министерот за надворешни работи Бујар Османи, додавајќи дека комуникацијата продолжува на ниво на МНР.
– За жал не се охрабрувачки вестите коишто доаѓаат од Бугарија во делот на формирање на институциите, бидејќи како што често нагласувам, очигледно тоа се покажа како важен фактор во изнаоѓање на решение за надминување на разликите коишто се причина за оваа непринципиелна блокада на нашата европска перспектива. Ние бевме во очекување дека овој втор обид ќе има инститиции за да можеме во тој политички дел да комуницираме и да изнаоѓаме решение – рече Османи.
Тој потврди дека Македонија е подготвена да продолжи со дијалогот, во очекување на предвидливост во Бугарија за да можат да продолжат политичките разговори. Министерот информира дека Македонија продолжува да ги испонува критериумите за членство во ЕУ и во услови кога европската перспектива на регионот не е во своите најблескави денови.
Османи информираше дека изминатава година Македонија има испорачано 100 придружувања кон Заедничката Надворешна и Безбедносна Политика на ЕУ.
– Практично од вчера, со последното придружување, Република Северна Македонија испорача 100 придружувања кон Заедничката Надворешна и Безбедносна Политика на ЕУ за неполна година, или поточно, од септември минатата година откако јас ја презедов одговорноста да ја предводам дипломатијата. Со тоа, стапката на придружување во посочениот период порасна на над 95% што е покачување од три процентни поени споредно со последниот извештај на Европската комисија кога изнесуваше 92%. Моја интенција е наскоро овој процент да достигне 100% како израз на нашата јасна надворешно политичка ориентација кон европските и евроатлантските структури – истакна Османи.
Говорејќи за инструменти преку кои ги развиваме партнерските односи со земјите членки на ЕУ, Османи ја потенцираше принципиелноста на нашата позиција, како демонстрација на европска сериозност во водењето на нашата надворешна политика, и тоа во време кога земјата е соочена со многу сериозна но непринципиелна препрека за напредок во европските интеграции.
– Во време кога и самата Европската Унија не успева да обезбеди консензус за продолжување на нашето европско интегрирање, ние јасно покажуваме дека сме цврст и принципиелен партнер, и дека од аспект на нашата европска ориентација ние немаме дилема дека сме дел од Европа и дека припаѓаме внатре во Унијата. Република Северна Македонија станува најсилна точка во заштитата и промоцијата не евроатлантските вредности во регионот, и затоа, со право сметаме дека е време и Европската Унија да ја демонстрира својата принципиелност кога се работи за нашите европски интеграции. Ние испорачуваме, треба и Европската Унија да испорача – заклучи Османи.
