Премиерот и лидер на СДСМ, Зоран Заев и претседателот на опозициската ВМРО-ДПМНЕ, Христијан Мицкоски неспоредно пред почетокот на ТВ дуелот денеска со пораки на Фејсбук за претстојното телевизиско соочување.
ТВ-дуелот почнува во 18.30 часот на емисијата „Само вистина“ на Канал 5.
Власта и опозицијата да дадат јасни одговори пред граѓаните и да ги судрат своите интереси, е пораката што преку Фејсбук ја испрати Заев, нагласувајќи оти тоа доликува на едно демократско општество.
-Во време на демократија и слобода, власта и опозицијата треба да даваат јасни одговори пред граѓаните и да ги судрат своите идеи и аргументи. Имаме одговорност да бидеме реални и да работиме за доброто на сите граѓани на нашата земја. Секој од нас треба да им ги соопшти на граѓаните своите планови за напредокот и своите ставови за најтешките прашања, доколку ги има. По тој повод, следете го политичкиот дуел вечерва со мене и претседателот на ВМРО-ДПМНЕ, на Канал 5 во 18.30 часот – наведува Заев во пораката на социјалната мрежа.
За вистината и отворено за проблемите на граѓаните, но и за забелешките во однос на постапките на сегашната власт, најави дека ќе се говори во ТВ дуелот лидерот на ВМРО-ДПМНЕ, Христијан Мицкоски.
-За вистинската вистина, отворено за проблемите на граѓаните, за заевизмот кој ја тоне Македонија, за честа и достоинството која власта сака да го одземе, за неправдите кои ги донесоа, за иднината на нашата земја. Следете ме на „Само вистина” на Канал 5 телевизија во 18.30 часот – порача Мицкоски.
