Само во Скопје хоспитализирани речиси 500 лица
Во изминатите 24 часа во ковид-центрите во Скопје се хоспитализирани вкупно 474 лица сомнителни и потврдени со ковид-19. Во последното деноноќие, на интерните клиники имало вкупно 20 приеми, а дома биле пуштени девет оздравени пациенти.
Во моментов на Кожната клиника во ковид-центарот се лекуваат 24 пациенти, на Клиниката за неврологија 37 болни, а на Институтот за ТБЦ се примени вкупно 54 пациенти со симптоми на коронавирусот. На Клиниката за гастроентерохепатологија се лекуваат вкупно 26 лица, во ковид-центарот на Клиниката за нефрологија во моментов се сместени 24 пациенти, а на Клиниката за очни болести 12 пациенти. Во ГОБ „8 Септември“ има вкупно 108 болни, на Клиниката за инфективни болести лежат 159 пациенти, додека во Институтот за белодробни заболувања кај деца во Козле има 30 пациенти, од кои девет деца и 21 возрасен.
Гудрун Штајнакер: Апсурдно e да се тврди дека македонскиот јазик е дијалект на бугарскиот
Гудрун Штајнакер, поранешна амбасадорка на Германија во Македонија, во анализа за Дојче веле вели дека е апсурдно да се тврди дека македонскиот јазик е дијалект на бугарскиот.
– Бугарија ја повикува Македонија официјално да признае дека македонскиот јазик е едноставно бугарски дијалект. Сепак, ова де факто ѝ помага на националистичката опозиција во Македонија, ВМРО-ДПМНЕ, која сега триумфално тврди дека премиерот Зоран Заев повторно нема да започне преговори за членство во ЕУ. И тврдењето дека македонскиот јазик е само дијалект на бугарскиот јазик тешко може да се надмине во неговиот апсурд. Како што денешниот бугарски јазик се формирал со појавата на државноста како стандарден јазик заснован на разни дијалекти, така и македонскиот јазик е создаден по крајот на Втората светска војна од писателот Блаже Конески врз основа на голем број дијалекти што се зборувале на денешната територија на Македонија. Да, точно е дека македонскиот јазик како официјален јазик потекнува релативно доцна, но тој е еднакво важен како и другите подоцнежни кодифицирани национални јазици во Европа – пишува во својата анализа Гудрун Штајнакер, која освен заменик-амбасадорка на Германија во Софија од 2006 до 2009 година, била и амбасадорка во Скопје од 2011 до 2014 година.
Таа додала дека барањето на Бугарија до Македонија е навредливо, провокативно, ненаучно, нереално. Додава дека германската влада мора да го искористи своето претседателство со ЕУ за да ја убеди бугарската влада, а особено премиерот да ја преземе одговорноста за Европа и да им остави на експертите да ги решаваат споровите за историјата и за јазикот.
