По единаесетти пат, денес 28.07.2025 година, самостојната Кичевска коњаница „Пресвета Богородица Пречиста“ го започна своето патешествије од истоимениот манастир до славно Крушево. По утрената Богослужба збогатена со литургија и избор на војвода, коњаницата тргна по својот пат до Крушево, каде на втори август ќе биде дел од дефилето на коњаниците, на свеченото одбележување на овој голем национален празник.
-Коњаницата „Пресвета Богородица Пречиста Кичевска“ по единаесетти пат зеде учество на Илинденскиот марш за на 2-ри Август да биде во дефилето на Мечкин Камен во Крушево. По утрената Богослужба , 25 коњаници што зедоа учество во кичевската коњаница , во 10 часот положија заклетва а за војвода го избраа Орце Богданоски од Кичево. Потоа преку Манастирско Доленци и Србјани тргнаа кон градот Кичево, каде низ градот ќе имаат свечено дефиле и посета на градската црква„ Свети Петар и Павле“. Потоа коњаниците патот ќе го продолжат низ селата Другово, Пополжани, Видрани, Брждани и Свињишта, за вечерта околу 20 часот да пристигнат во селото на славниот војвода Јордан Пиперката, Козица, каде ќе биде организирана комитска вечер збогатена со музичка програма а ќе бидат доделени плакети и благодарници – истакна основоположникот на кичевската коњаница Станоја Станојоски и продолжи.
По ноќевањето во Козица коњаницата утре претпладне преку селата Белица, Прострање, Велмевци, Бабино и Жван ќе пристигне во село Сопотница, каде и ќе ноќева. Во текот на вечерта во селото ќе биде организирана комитска вечер збогатена со музичка програма на групата„ Бели Мугри“ од Кичево.
Наредниот ден коњаницата заминува од Сопотница и се упатува кон Прибилци, Сладуево а комитска вечер ќе биде организирана во село Журче, збогатена со музичка програма во која ќе учествува пеачката Елена Велевска со нејзиниот бенд.
На 31 јули,четврток, коњаницата од Журче преку Острилци ќе се упати кон Крушево каде ќе се спои со коњаницата на Здружението„ Илинденски марш 1978“ од Скопје и заедно ќе влезат во Крушево. На 1-ви август кичевската коњаница ќе биде дел од свеченото дефиле низ градот Крушево, додека на 2- август,сабота, ќе се упати кон Мечкин Камен и ќе учествува на манифестацијата 10 дена Крушевска Република. На 3-и август кичевската коњаница од Крушево ќе се упати кон село Кладник каде во понеделник на 4-ти август, кога била и славната битка на Ѓурѓејца ќе се поклони пред споменикот а ќе биде извршено и доделување на плакети и благодарници-додаде Станојоски. З.А.
