Кумановските села Орашец, Шупли Камен и Добрашане, како и селата Дрење, Киселица, Голема и Мала Црцорија, Трново, Слатино, Крстов дол и Подржи коњ во општина Крива Паланка поради обилните врнежи моментно се без електрична енергија, соопшти ЦУК.
Повикувајќи се на своите регионални канцеларии, ЦУК информира и дека екипи на „Македонија пат“ го расчистувале патниот правец А2 од местото викано Четал кон Кратово и општина Пробиштип каде имало поситни одрони, но сообраќајот се одвивал редовно со претпазливост и внимателно возење.
На територијата на Град Скопје, како резултат на интензивните врнежи паднато е суво дрво на булеварот „Свети Климент Охридски“, но не е причинета материјална штета. Известено е ЈП „Паркови и зеленило“ за преземање мерки кои се во негова надлежност.
Во останатите делови од државата поројниот дожд не предизвикал штети и застои.
– РЦУК Тетово известува дека во регионот што го покривара ПОРКОА РЦУК Тетово нема штети предизвикани од невремето. Во моментот има врнежи од дожд кои се со слаб интензитет. РЦУК Велес известува дека во регионот што го покрива ПОРКОА РЦУК Велес нема штети предизвикани од невремето. Сите патни правци се проодни, нема прекини во комуналната свера. Времето е стабило со дожд со слаб интензитет. РЦУК Струмица известува дека нема обилни врнежи од дожд и невреме, поплавени улици, поплавени куќи, поплавени подруми, одрони на одредени патни правци. РЦУК Битола известува дека нема некои посериозни последици од обилните врнежи. РЦУК Штип известува дека во моментот нема никакви пријавени настани, сите патни правци се проодни и нема поплавен објект. РЦУК Охрид известува дека нема обилни врнежи од дожд и невреме, поплавени улици, поплавени куќи, поплавени подруми или пак одрони на патна инфраструктура, наведува ЦУК во денешната вонредна информација за состојбата до 12 часот.
Најмногу дожд до осум часот утрово наврнал во Куманово, каде се измерени 52 литра на метар квадратен, на Попова Шапка 47 и 42 литра во Тетово.
Сспоред Управата за хидрометеоролошки работи, во изминатите 24 часа во Пожаране наврнале 40 литри, Скопје-Петровец 34, Прилеп 33, Крушево и Скопје – Зајчев Рид 32, Маврово 26 , Виница 24, Охрид 22, Претор 18, Штип 17, Лазарополе и Ѓуриште 16, Тополчани 15, Демир Капија 11, Крива Паланка 10, Битола 8, Струмица и Гевгелија шест, Берово пет и во Дојран четири литри на метар квадратен.
УХМР за денеска најавува претежно облачно и свежо со врнежи од дожд, кои на повеќе места ќе бидат обилни, од 10 до 20 литри на метар квадратен. Локално врнежите ќе бидат поројни проследени со грмежи и со услови за ретка појава на град. Ќе дува умерен до засилен северен ветер. Максималната температура ќе биде во интервал од 18 до 24 степени. Времето во наредните денови ќе биде претежно стабилно, со слаб до умерен, а долж Повардарието повремено засилен ветер од северен правец. Како што најавува УХМР, и температурите во периодот што следува ќе бидат повисоки.
