Премиерот Христијан Мицкоски изјави дека Обвинителството треба да го повика доктор Жан Митрев да даде исказ и докази во врска со неговите тврдења за наводен обид за преземање на болницата „Жан Митрев“ од страна на поранешни владини функционери. Во гостување во емисијата „Тема на денот“ во Дневникот на Сител, Мицкоски нагласи дека институциите треба да утврдат дали изнесените наводи се вистинити.
-Тврдењата на Жан Митрев се тврдења на жртва на луѓе од претходната власт. Јас не знам дали некој го повикал од Обвинителството Жан Митрев да посведочи и да даде докази, тоа е суштината. Очекувам идниот обвинител или обвинителка, не е битно, тој што ќе биде избран, да му биде тоа прва задача. Да го повика Жан, ако досега тоа некој не го направил, да го повика бидејќи човекот излезе јавно и кажа дека бил предмет на уцена на високи државни функционери – кажа премиерот Мицкоски.
Тој додаде дека постојат и други случаи на можни злоупотреби и корупција кои, според него, треба да бидат предмет на истрага, изразувајќи очекување дека со изборот на нов јавен обвинител граѓаните ќе бидат охрабрени да пријавуваат со конкретни докази.
-Тоа е суштината. Не е суштината дали Зоран Заев поднел тужба за клевета кон „Иск“ лице или кон „Ипсилон“ лице. Суштината е дали нашето Обвинителство го повикало тој кој што тврди или тие коишто тврдат, не е само тој. Мене лично ми дошле многу луѓе коишто ми сведочеле дека биле жртва на уцена од претходната Влада. Ајде во претходниот состав на Обвинителството разбирам, се плашеле, бил обвинител којшто бил избран од претходното мнозинство, немале доверба можеби, не знам, но очекувам дека со новиот државен јавен обвинител, сите овие коишто мене ми доаѓаат и ми пријавуваат дека биле жртва на уцени, преземање непријателски на бизниси итн. да си пријават со докази како се исплаќани фактури во РЕК Битола, па како тие завршуваат магично на фирми во Бугарија итн. Тука имаме еден поширок опфат на нештата – потенцираше Мицкоски и додаде:
-Тоа е суштината. Дали некој во Јавното обвинителство го повика Жан Митрев да даде исказ и да даде докази? Тука најлесно ние ќе знаеме дали е вистина тоа или не е вистина. Дали некој туку-така си излегува и си кажува или не е така.
