Претседателката на Уставниот суд Добрила Кацарска и претходно добивала закани на социјалните мрежи, но не ги пријавила во полицијата, сѐ до вчерашниот инцидент со ножот најден пред нејзината гаража, известуваат од Уставниот суд.
– Во однос на прашањата дали имало закани досега, претседателката Кацарска потврдува дека имало повеќе непријатности во јавноста и ситни инциденти изминатиот период кои не се пријавени, закани преку социјалните мрежи, но на нејзино лично инсистирање, не дозволила да се реагира се до вчерашната пријава – велат од Уставниот суд.
Од тука потврдија дека во текот на вчерашниот ден, Кацарска во полициска станица пријавила евентуално загрозување на сигурноста, откако на нејзиниот приватен паркинг, во близина на нејзиниот дом, на место каде што се наоѓа нејзиниот личен автомобил, најден е нож до прекинувачот за струја што го осветлува делот околу нејзиниот паркинг.
Што се однесува до прашањата дали станува збор за некаква закана, порака до претседателката Кацарска или се работи за случајност, очекуваме одговорите да ги даде истрагата, велат од судот.
Претходно, за случајот информираше МВР.
– Вчера од страна на Д.К. било пријавено дека на подрачјето на Центар во подземни гаражи, пред нејзиното гаражно место, биле пронајдени импровизиран кревет и кујнски нож, кој бил забоден на прекинувачот за светло – велат од МВР.
За случајот известен е јавен обвинител.
